МІНСК, 7 мая — Sputnik. Гурт "Дай Дарогу!" адзначыць сваё 20-годдзе святочным канцэртам, які адбудзецца 8 мая ў мінскім клубе Prime Hall.
"Не ўсе людзі дажываюць да 20 гадоў, а мы ўсё яшчэ на плыву і грабем ў правільным кірунку!" — сказаў лідар гурта Юрый Стыльскі.
Канцэрт адбудзецца 8 мая: менавіта ў гэты дзень апошнія гады "Дай Дарогу!" радавалі мінчан сваім вясновым шоу. Звычайна яно адбывалася ў клубе Re:Public, але ў гэтым годзе гурт вырашыў змяніць пляцоўку.
"Нам 20, і нас стала настолькі шмат, што прыспеў час пашыраць далягляды і спрабаваць для сябе нешта новае. Трэба праверыць, наколькі мы сапраўды моцныя", — патлумачыў Стыльскі.
Гурт "Дай Дарогу!" быў заснаваны ў Брэсце ў маі 1998 года. На яго рахунку сем арыгінальных студыйных альбомаў, два акустычныя і адзін зборнік лепшых хітоў. За 20 гадоў у гурце мяняліся ўдзельнікі, але прыхільнасць музыкаў ідэалам сапраўднага панк-рока і шчырыя тэксты заўсёды заставаліся і застаюцца нязменнымі.
Апошнія паўтара года "Дай Дарогу!" прысвяцілі маштабнаму туру "СацПакет", куды ўвайшлі самыя вострасацыяльныя хіты з усіх альбомаў. З гэтай праграмай гурт аб'ездзіў Беларусь, Украіну і Расію, таксама пабываў у Польшчы і Чэхіі.
На шоу, якое адбудзецца ўжо заўтра, музыкі абяцаюць здзівіць усіх незвычайным гукам і запрошанымі сакрэтнымі гасцямі.
Набыць квіткі можна на адмысловых сайтах у інтэрнэце і ў касах горада. Дадатковая інфармацыя знаходзіцца на старонцы гурта "УКантакце" і ў суполке, прысвечанай юбілейнаму канцэрту.
