У невялікай зале Гістарычнага музея мнагалюдна — новая выстава "Пад туфлікам у музы. З гісторыі абутку" выклікала сапраўдны ажыятаж. Тут можна ўбачыць абсалютна розны абутак — ад лапцей да пуантаў, ад лыжных ботаў Дар'і Домрачавай, якія "пахнуць алімпійскім золатам" да туфляў Лэдзі Гагі.
Акрамя асобнікаў з фондавых калекцый Гістарычнага музея і яго філіяла — Музея тэатральнай і музычнай культуры, на выставе прадстаўлена абутак з прыватных збораў і творы беларускіх дызайнераў.
Стэнды ля самага ўваходу адразу кідаюцца ў вочы — на іх пераліваюцца стразамі і вышыўкай неверагодныя туфлі і аксэсуары автораства Янжа Нядвецкага.
Рэкардсмен Кнігі рэкордаў Гінеса як стваральнік самай працаёмкай і эксклюзіўнай пары абутку, мінскі дызайнер ствараў абутак і аксэсуары для такіх знакамітасцяў як Лэдзі Гага, Моніка Белучы, Джоні Дэп, Патрысія Каас, Мірэй Мацье.
Знакаміты дызайнер пахваліў выставу і выказаў падзяку музею за магчымасць прадэманстраваць свае творы, па яго словах, "у фармаце гардэробнай" — у невялікім і ўтульным памяшканні.
Сваёй яркасцю і вытанчанасцю ліній погляд прыцягвае валены абутак з калекцыі дызайнера Юліі Чэрняковіч, якая прыйшла на выставу з дачкой Варварай. Стварэннем абутку і валяннем адзення дызайнер займаецца ўжо чатыры гады, а пачынала, як і многія, з маленькіх брошак.
"Гэта індывідуальная работа — шырыню, пад'ём, даўжыню ступні, усё заўсёды ўлічваем, вымяраем пад кожнага чалавека", — расказала Юлія пра сваю працу. Паводле яе слоў, абутак, які яна стварае, не толькі мадэльны, але і прызначаны для штодзённага нашэння.
Па перыметры залы прадстаўлены экспанаты, якія дазваляюць глыбей акунуцца ў гісторыю абутку і нават у тонкасці яго стварэння — тут можна ўбачыць і інструменты шаўцоў.
"У такой невялікай прасторы сабраны асноўныя тэндэнцыі ХХ стагоддзя на тэрыторыі Беларусі і самыя яркія напрамкі ХХІ стагоддзя, — кажа куратар выставы Юлія Крыўдзюк. — Гэтай выставай мы стараемся паказаць, што не бывае ўтылітарных рэчаў. Мастацтва ў паўсядзённых рэчах, у кожнай паўсядзённай рэчы трэба шукаць прыгажосць".
Выстава будзе цікавая і мужчынам — тут шмат ваеннага абутку, абмотка часоў трэцяга рэйха.
Таксама можна ўбачыць спартыўны абутак — лыжныя боты Дар'і Домрачавай, у якіх яна заваявала алімпійскае золата, а таксама абутак знакамітага барца Аляксандра Мядзведзя.
Убачыць узоры дызайнерскага мастацтва і абутак "з гісторыяй" можна на працягу месяца. Часовая экспазіцыя будзе працаваць у музеі да 10 чэрвеня.
