МІНСК, 9 мая — Sputnik. Дзяліць Перамогу сёння няправільна, такую заяву ў ходзе звароту з нагоды святкавання Дня Перамогі ў сераду выказаў прэзідэнт Беларусі Аляксандр Лукашэнка.
Беларускі лідэр і вышэйшыя службовыя асобы краіны ў сераду ўсклалі вянкі да манумента на плошчы Перамогі. Пасля цырымоніі кіраўнік дзяржавы звярнуўся да беларусаў з нагоды святкавання.
"Мы свята шануем самаадданасць ўсіх, хто з гонарам прыняў удар і з першых дзён вайны не даваў літасці ворагу. Хто, не шкадуючы ўласнага жыцця, ішоў у бой. Хто ўпартай і цяжкай працай забяспечваў фронт, бясстрашна супрацьстаяў захопнікам на акупіраванай тэрыторыі", — заявіў Лукашэнка.
Прэзідэнт падкрэсліў: важна памятаць пра гераічны подзвіг народа.
"Час няўмольны ідзе наперад. Заглушае боль, супакойвае памяць. На жаль, чалавечае жыццё зноў абясцэньваецца. Свет падзяляецца, бурацца шматгадовыя асновы, сціраюцца духоўныя арыенціры", — канстатаваў Лукашэнка.
Беларускі народ, дадаў прэзідэнт, беражліва захоўвае простыя і зразумелыя каштоўнасці: магчымасць сустрэць мірны світанак, удыхаць водар гарачага хлеба, чуць смех дзяцей і планаваць іх будучыню. "Мы ведаем цану свабоды і незалежнасці. Таму так трапятліва ставімся да гісторыі, так дбайна адстойваем прынцыпы сумленнасці, справядлівасці і роўнасці", — дадаў ён.
"Мы, беларусы, заўсёды змагаліся за недапушчэнне скажэння гісторыі, асабліва Вялікай Айчыннай вайны. Змагаліся супраць падобнага роду шарлатанаў і не думалі, што давядзецца змагацца і з другога бядой — прыватызацыяй нашай Перамогі", — сказаў прэзідэнт.
Лукашэнка спаслаўся на словы пасла Расіі ў Беларусі Аляксандра Сурыкава: ён сказаў пра тое, што нашы краіны разам перамаглі ў гэтай страшнай і жорсткай вайне. "Не будзь мы разам тады, мы б і сёння стаялі на каленях", — упэўнены Лукашэнка.
"Дзяліць гэтую Перамогу сёння не да месца", — дадаў прэзідэнт.
Кіраўнік дзяржавы дадаў: праводзячы міралюбівую палітыку, Беларусь ніколі не адмовіцца ад сваіх перакананняў, але і не будзе іх нікому навязваць. "Але заўсёды працягнем руку дапамогі таму, хто ў ёй мае патрэбу. Гэта наша цвёрдая і паслядоўная пазіцыя", — сказаў на заканчэнне ён.
