МІНСК, 16 мая — Sputnik. Сума, выручаная за "Супрэматычную кампазіцыю" Казіміра Малевіча, склала 85,8 мільёна долараў, паведамляецца на старонцы ў сацсетцы Twitter аўкцыёну Christie's.
#AuctionUpdate ‘Suprematist Composition’ by #KazimirMalevich sold for $85,812,500, a new #WorldAuctionRecord for the artist for the same piece! https://t.co/YhzKekKg9N pic.twitter.com/xZ0KHyd2HG
— Christie's (@ChristiesInc) 15 мая 2018 г.
Тым самым карціна ўстанавіла новы сусветны рэкорд гэтага мастака за паўторна прадаваную працу — у 2008 годзе яна пайшла з малатка на аўкцыёне Sotheby's у Нью-Ёрку за 60 мільёнаў долараў. Пакупнік тады вырашыў застацца невядомым.
Карціну яшчэ называюць "Сіні прастакутнік над чырвоным прамянём". Спецыялісты ацэньвалі гэтую працу ў 70 мільёнаў долараў і лічаць яе самай лепшай і самай складанай працай з першых рэвалюцыйных карцін мастака. Малевіч напісаў гэтую працу ў студзені 1916 года пасля выставы работ пад агульнай назвай "Супрэматызм", якая прайшла ў снежні 1915 года ў Петраградзе.
У 1927 годзе Малевіч выстаўляў карціну на выставах у Варшаве, а пазней у Берліне. Затым "Супрэматычная кампазіцыя" знаходзілася ў Германіі, пазней экспанавалася ў музеях Нью-Ёрка і Амстэрдама. У 2008 годзе карціну вярнулі нашчадкам Малевіча.
