Мінчане святкуюць Дзень пагранічніка ў парку Горкага

МІНСК, 27 мая — Sputnik. Святочныя гулянні ў гонар Дня памежніка праходзяць у сталічным парку культуры і адпачынку імя Максіма Горкага ў нядзелю.

Увесь дзень у парку працуюць забаўляльныя зоны, праходзяць спаборніцтвы і канцэрты: выступіў і ўзорна-паказальны аркестр Інстытута пагранічнай службы і роты ганаровай варты.

"Гісторыя нашай службы поўная прыкладамі гераічных подзвігаў пагранічнікаў, якімі мы па праву ганарымся. Але яна таксама поўная прыкладамі аховы мяжы грамадзянамі краіны. Тут сабраліся жыхары Мінска, іншых гарадоў і вёсак, каб падтрымаць і павіншаваць пагранічнікаў — святкуем разам і мяжу ахоўваем таксама разам", — перадае словы намесніка старшыні Дзяржпагранкамітэта генерал-маёра Уладзіміра Маісеенкі прэс-служба ДПК.

Пляцоўку падзялілі на 14 тэматычных зон, на кожнай з якіх прайшлі відовішчныя выступы: напрыклад, кінолагі дэманстравалі навыкі сваіх верных чацвераногіх сяброў, прайшоў паказ прыёмаў рукапашнага бою, а таксама рэканструкцыя сапраўднага рыцарскага бою.

На выставе госці свята могуць убачыць сучасныя ўзоры авіяцыйнай тэхнікі пагранічнікаў, форменнага абмундзіравання, плавальных сродкаў і зброі. А ў гастразоне — прадэгуставаць пагранічную палявую кухню.