Сёння выхаванка дзіцячага дома і фіналістка праекта "Ты супер!" Вера Ярошык вярнулася ў Беларусь. На праекце дзяўчына заняла другое месца, але, нягледзячы на поспех у Маскве, запэўнівае, што "падчапіць" зорную хваробу не баіцца, хоць адна з прыхільніц творчасці Веры ўжо стварыла тэматычную групу "УКантакце". Там пакуль няшмат чалавек, але для самой Веры такая вядомасць нязвыклая.
Яна застаецца шаснаццацігадовай школьніцай, якая перажывае з-за вучобы, пра якую даводзілася часам забываць на праекце, і больш за ўсё на конкурсе цэніць сустрэчы з новымі сябрамі.
У прэс-цэнтры Sputnik яна распавядала, з кім паспела пасябраваць у Маскве, і пра тое, якія кампазіцыі ёй хочацца спяваць са сцэны. Вера слухае песні Селены Гомез, а сама хацела б выканаць што-небудзь з рэпертуару Арыяны Грандэ. Але перш, чым думаць пра гастролі, Вера хоча сустрэцца з роднымі.
Пасля фіналу многія павіншавалі Веру, а сама яна патэлефанавала бабулі. Цяпер яна больш за ўсё хоча ўбачыць яе, маму і брата. Як сустракалі Веру ў Мінску, глядзіце на відэа Sputnik.
