МІНСК, 20 чэр — Sputnik. Мандат на перамовы з Еўрапарламентам аб унясенні паправак у візавыя правілы выдаў у аўторак камітэт ЕС на ўзроўні пастаянных прадстаўнікоў, паведамляецца на сайце савета.
У адпаведнасці з папраўкамі, падаць дакументы на візу можна будзе максімум за 6 месяцаў і не менш чым 15 дзён да даты паездкі. Запоўніць і падаць заяўку стане магчыма ў электронным выглядзе. Таксама будзе ўзгоднены адзіны падыход да выдачы шматразовых віз на тэрмін ад 1 да 5 гадоў — у залежнасці ад таго, ці мае заяўнік "станоўчую візавую гісторыю".
Акрамя таго, прадугледжваецца ўнесці яснасць у "вызначэнне таго, якая дзяржава валодае кампетэнцыяй для разгляду заявы, калі запланаваны візіт ахоплівае некалькі краін ЕС".
Як адзначылі ў ЕС, змены прызначаныя для паляпшэння ўмоў для "законных падарожнікаў", і закліканы зрабіць працэдуры афармлення "больш хуткімі і дакладнымі".
Для пакрыцця выдаткаў на афармленне візаў цана павысіцца з 60 еўра да 80 еўра.
"Для таго, каб дзяржавы-члены маглі лепш пакрываць выдаткі на афармленне віз, не ствараючы стрымліваючых фактараў для заяўнікаў, візавы збор будзе павялічаны да 80 еўра", — паведамілі ў прэс-службе.
Пры гэтым магчымасць змянення кошту ўязных дакументаў Еўрасаюза павінна будзе абмяркоўваць кожныя тры гады.
Раней у беларускім МУС паведамлялі, што Беларусь плануе дамовіцца аб спрашчэнні візавага рэжыму з Еўрасаюзам да канца гэтага года. Меркавалася, што ў выніку шэнгенскія візы стануць для беларусаў танней, і атрымаць іх будзе лягчэй. Умовай для спрашчэння візавага рэжыму называлася падпісанне пагаднення аб рэадмісіі.
