МІНСК, 25 чэр — Sputnik. Генпракуратура возьме пад кантроль правядзенне канцэрту гурта "Ленінград" у Мінску і высветліць у арганізатараў яго скіраванасць, заявіў журналістам у панядзелак намеснік генеральнага пракурора Беларусі Аляксей Стук.
З пачатку года з-за патрабаванняў Генпракуратуры ў Мінску былі адмененыя некалькі канцэртаў — у тым ліку рэпера Face, паўднёваафрыканскай групы Die Antwoord і іншых.
"Парушэнні пры правядзенні культурна-відовішчных мерапрыемстваў — парушэнні прысваення знака ўзроставай катэгорыі. У асобных праграмах змяшчалася ненарматыўная лексіка, якая заклікала да дыскрымінацыі па рэлігійнай прыкмеце, ужывання алкаголю і наркотыкаў", — растлумачыў намеснік генпракурора.
Па словах Стука, ведамства прапаноўвала арганізатарам прывесці дзейнасць у адпаведнасць з заканадаўствам, "аднак некаторыя канцэрты проста адмянілі".
Пацікавіліся журналісты ў намесніка генпракурора і тым, ці правярала ўжо Генпракуратура канцэрт гурта "Ленінград", які адбудзецца ў снежні: калектыў вядомы частым выкарыстаннем ненарматыўнай лексікі.
"Калі канцэрт у будучыні, то мы возьмем пад кантроль яго правядзенне і высвятлім у арганізатараў яго скіраванасць і адпаведнасць заканадаўству", — паабяцаў Стук.
Да арганізатараў, якія праводзілі ў рэспубліцы культурна-відовішчныя мерапрыемствы з парушэннем заканадаўства, прымалі меры — у тым ліку прыцягвалі да адміністрацыйнай адказнасці.
