ВІЦЕБСК, 25 чэр — Sputnik. На цэнтральнай пляцоўцы горада на працягу дзвюх гадзін усе жадаючыя маглі бясплатна атрымаць майстар-клас ад лепшых настаўнікаў ёгі.
Нягледзячы на дажджлівае надвор'е, побач з Летнім амфітэатрам сабралася шмат жадаючых зарадзіцца энергіяй. Марафон, прымеркаваны да Міжнароднага дня ёгі, быў арганізаваны пры падтрымцы аддзела спорту і турызму Віцебскага гарвыканкама, а таксама пасольства Індыі ў Рэспубліцы Беларусь.
Комплекс ранішніх практыкаванняў, дыхальныя тэхнікі, медытацыі — людзі любога ўзросту маглі паспрабаваць свае сілы ў вывучэнні старажытных практык. Для занятка трэба было ўзяць толькі дыванок і бутэльку з вадой.
"У апошні момант даведалася, што такі класны марафон пройдзе ў нашым горадзе. На мой погляд, яго трэба было лепш праанансаваць. У Віцебску шмат людзей, якія жадаюць наведваць цікавыя мерапрыемствы. На жаль, не ўсе і не заўсёды ведаюць, калі і дзе яны праходзяць", — адзначыла Ірына.
У гэтым годзе правядзенне ёга-марафона супала са святкаваннем Дня горада. Аднак шумныя гулянні і здзіўленыя погляды мінакоў ніяк не перашкодзілі жадаючым атрымаць зарад бадзёрасці.
Заняткі былі падзеленыя на некалькі блокаў, якія вялі розныя выкладчыкі. Кожны з іх прадстаўляў сваю праграму. Як адзначылі арганізатары, мерапрыемства, якое праводзяць ужо ў чацвёрты раз, паступова набірае папулярнасць. Гэта звязана перш за ўсё з тым, што ёгай можа пачаць займацца любы чалавек, які нават не мае спецыяльнай падрыхтоўкі. У марафоне ўдзельнічалі і малыя, для якіх падрыхтавалі асобны майстар-клас.
