МІНСК, 26 чэр — Sputnik. Мінскі стадыён "Дынама" атрымаў вышэйшую ацэначную катэгорыю Міжнароднай асацыяцыі лёгкаатлетычных федэрацый (IAAF), паведамілі Sputnik у прэс-службе Беларускай федэрацыі лёгкай атлетыкі (БФЛА).
Урачыстая цырымонія адкрыцця "Дынама" пасля рэканструкцыі адбылася 21 чэрвеня. У мерапрыемстве ўзялі ўдзел прэзідэнт Беларусі Аляксандр Лукашэнка і кіраўнік IAAF Себасцьян Коэ.
"Ні для каго не сакрэт, што абноўлены Нацыянальны алімпійскі стадыён "Дынама" атрымаў сертыфікат лёгкаатлетычнага стадыёна ІААФ 1 класа", — распавялі ў БФЛА.
Суразмоўцы агенцтва звярнулі ўвагу, што гэта мае вялікае значэнне. "Таму што спаборніцтвы на адкрытым паветры, якія праводзяцца ў адпаведнасці з правілам 1.1 (a) (спаборніцтвы, якія ўваходзяць у Сусветную лёгкаатлетычную серыю), могуць ажыццяўляцца толькі на спартыўных збудаваннях, якія маюць такі сертыфікат", — растлумачылі ў БФЛА.
Нагадаем, на мінулым тыдні "Дынама" прыняў Міжнародны лёгкаатлетычны матч Балканы-Балтыка-Беларусь-Украіна. Перамогу ў спаборніцтвах святкавалі беларускія спартсмены.
Акрамя таго, на стадыёне ўжо адбыўся першы футбольны паядынак паміж аб'яднанай камандай мінскага і брэсцкага "Дынама" і зборнай клубаў чэмпіянату Беларусі (4:3).
У 2019 годзе "Дынама" стане галоўнай пляцоўкай II Еўрапейскіх гульняў. А ў 2024 годзе, як распавяла старшыня БФЛА Вадзім Дзевятоўскі, арэна будзе прэтэндаваць на правядзенне чэмпіянату Еўропы па лёгкай атлетыцы.
