Цэнтралізаванае тэсціраванне завяршылася ў Беларусі: абітурыенты ўжо ведаюць свае вынікі па большасці прадметаў і думаюць, куды ж падавацца са сваімі ацэнкамі вучыцца.
Такое пытанне відавочна не стаіць перад Анастасіяй Саванец з горада Ашмяны — яна здала два ЦТ на 100 балаў (хімія і біялогія), трэцяе — на 97 (беларуская мова) і пры гэтым у атэстаце мае максімальны бал. Дзяўчыне былі б рады ў любым ВНУ краіны.
"Паступаю я ў БДМУ (Беларускі дзяржаўны медыцынскі універсітэт — Sputnik). З факультэтам яшчэ не вызначылася", — прызналася карэспандэнту Sputnik Анастасія.
Рыхтавалася да цэнтралiзаванага тэсцiравання па хіміі і беларускай мове дзяўчына сама — займалася са школьнымі настаўнікамі, хадзіла на факультатывы. Па біялогіі, прызналася Анастасія, у яе быў рэпетытар.
"Выпрабаванні былі больш-менш нармальныя, калі не лічыць пары заданняў", — адказала яна на пытанне аб складанасці цэнтралізаванага тэсціравання.
Свае высокія вынікі Анастасія ўжо адсвяткавала з сям'ёй. Хутка плануе і з сябрамі.
"Была з сяброўкамі. Калі даведалася вынікі па беларускай мове, яны сказалі, што па астатніх будзе дзве "соткі". А я ў гэта не зусім верыла", — сказала на заканчэнне выдатніца.
Сертыфікаты аб праходжанні цэнтралізаванага тэсціравання пачнуць выдаваць з 10 ліпеня. Падача дакументаў у ВНУ стартуе 12 ліпеня. Якая колькасць у краіне "стобальнікаў" па прадметах і ці ёсць, акрамя Анастасіі, абітурыенты адразу з двума вышэйшымі баламі на цэнтралізаваным тэсціраванні, пакуль не вядома.
