МІНСК, 7 ліп — Sputnik. Адразу 17 кракадзілавых кайманаў вылупіліся ў тэрарыуме Мінскага заапарка, паведамілі напярэдадні заолагі.
У цяперашні час новыя гадаванцы знаходзяцца на каранціне, але ў заапарку запэўніваюць, што, як толькі яны памацнеюць, кайманаў абавязкова пакажуць наведвальнікам.
"Пара кракадзілавых кайманаў Хлопчык і Дзяўчынка прыносіць нашчадства ўжо ў трэці раз. Так што з'яўленне кайманаў і іх паспяховае вырошчванне стала звыклым", — сказалі ў заапарку.
Там таксама адзначылі, што такога вялікага прыплоду ў тэрарыуме яшчэ не было: ў 2016 годзе вылупіліся тры кайманы, а ў 2017-м — усяго адзін. "Так што з'яўленне 17 дзіцянятаў кайманаў можна лічыць неверагоднай удачай", — падкрэслілі спецыялісты.
Па іх словах, размнажэнне гэтага віду кракадзілаў ва ўмовах няволі — з'ява рэдкая, так што заапарку Мінска ёсць чым ганарыцца.
