МІНСК, 13 ліп — Sputnik. Планаў па добраўпарадкаванні Кальварыйскіх могілак у гарадскіх уладаў на бліжэйшы час няма, але ў перспектыве і там будзе наведзены парадак, заявіў намеснік старшыні Мінскага гарвыканкама Віктар Лапцеў.
"Планаў па Кальварыйскіх (могілках — Sputnik) сёння няма, але ў любым выпадку парадак там наводзіцца будзе", — сказаў Лапцеў.
Пытанне ўзнікла ў сувязі з грамадскім рэзанансам, які выклікалі работы па добраўпарадкаванні іншых старых могілак Мінска — Вайсковых. Спецкамбінат камунальна-бытавога абслугоўвання (КБА) у чэрвені пачаў добраўпарадкоўваць пахаванні, дэмантаваць іржавыя крыжы і агароджы на недагледжаных магілах, чым выклікаў крытыку з боку грамадскасці. На месцы магіл супрацоўнікі Спецкамбіната ўсталёўваюць тыпавыя пліты- "надгалоўнікі". Актывісты і валанцёры нагадалі гарадскім уладам, што Вайсковыя могілкі з'яўляюцца гісторыка-культурнай каштоўнасцю, і патрабуюць адмысловага стаўлення.
"Хачу сказаць галоўнае — тут няма пагалоўнага зносу. Я, напэўна, разы чатыры да таго, дапускаючы, што можа быць негатыўная рэакцыя, абышоў могілкі. Пахадзіў па магілах, пачытаў, паглядзеў. Мне было складана прыняць гэтае рашэнне, але цяпер, бачачы вынік і вяртаючыся да ўчасткаў, на якіх працы не праводзіліся, маё меркаванне, што мы дзейнічаем правільна", — сказаў Лапцеў.
