МІНСК, 25 ліп — Sputnik. Аранжавы — перадапошні — узровень небяспекі аб'яўлены ў Беларусі на сераду, 25 ліпеня, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
Па дадзеных метэаролагаў, удзень у сераду на большай частцы тэрыторыі краіны прагрымяць навальніцы, у некаторых раёнах яны будуць суправаджацца моцнымі ліўнямі, шквалістым ветрам да 20 метраў у секунду і нават градам. Навальніца з моцным ветрам (да 14 метраў у секунду) чакаецца і ў Мінску.
Надвор'е ў рэспубліцы ў гэты дзень будзе вызначаць цёплая няўстойлівая паветраная маса. Будзе воблачна з праясненнямі, у некаторых раёнах чакаецца слабы туман.
Тэмпература паветра ў сераду, 25 ліпеня, захаваецца высокай: уначы і раніцай будзе + 15… 20°С, пасля абеду паветра прагрэецца да + 23… 29°С.
Раней сіноптыкі паведамлялі, што надвор'е будзе няўстойлівым на працягу ўсяго тыдня: будзе цёпла, аднак чакаюцца навальніцы і ліўні. Па папярэдніх прагнозах, сонечнага надвор'я беларусы могуць чакаць не раней, чым у будучую нядзелю.
