Нарэшце зацяжную чараду дажджоў і навальніц змяніла самае сапраўднае лета — такое доўгачаканае. У мінулую нядзелю слупок тэрмометра замахнуўся на адзнаку самага гарачага дня за гэты сезон, а натоўпы мінчан пачалі шукаць выратаванне ад духаты і распаленага асфальту на сталічных пляжах.
Адпачынак беларуса падобны на пралёт каметы — выбліскам выбухае сярод шэрых будняў і імгненнем пралятае над галавой, так што часам і не паспееш зразумець, быў ён ці не. Тым не менш, добра правесці лета хочацца кожнаму, таму тысячы мінчан на выхадных перамясціліся бліжэй да вады.
Здаецца, кожны кавалачак пяшчанага пляжу быў заняты людзьмі, якія загараюць, а некалі пустуючая берагавая лінія стала нагадваць папулярны курорт. Пляжы хай і з цяжкасцю, але спраўляліся з наплывам людзей: чэргі ў распранальні і душавыя былі невялікімі. А вось стацыянарных шэзлонгаў і парасонаў на ўсіх не хапіла, адпачывальнікі неслі свае. Тое ж датычыцца і грамадскага харчавання: кропак з продажам напояў і закусак было вельмі мала, ратавала тое, што прыхапілі з сабой, і марозіва з бліжэйшага супермаркета.
