МІНСК, 7 жні — Sputnik. Кошт камплекта адзення дзелавога стылю для школы ў крамах у гэтым годзе будзе пачынацца ад 77 рублёў, пра гэта заявіла начальнік упраўлення ўнутранага гандлю і выставачнай дзейнасці канцэрна "Беллегпрам" Святлана Кахро.
Па дадзеных "Беллегпрама", для хлопчыкаў малодшага школьнага ўзросту (1-4 клас) камплект пінжак — штаны — сарочка беларускай вытворчасці будзе каштаваць ад 85-106 рублёў, для школьнікаў з 5-9 класаў — 96-125 рублёў, для старшакласнікаў (10-11 клас) — 123-151 рубель. За пашыраны камплект пінжак — камізэлька — штаны — сарочка бацькам школьнікаў з 1-4 класаў давядзецца аддаць 101-130 рублёў, з 5-9 класаў — ад 113 да 152 рублёў, кошт на форму для хлопчыкаў старэйшага школьнага ўзросту складзе 151-181 рубель.
На камплект для дзяўчынак, які складаецца з жакета, камізэлькі, спадніцы і блузкі бацькам малодшакласніц прыйдзецца выдаткаваць ад 77 да 120 рублёў, для вучаніц 5-9-х класаў — 79-130 рублёў, для 10-11-х класаў — ад 116 да 165 рублёў. Пры гэтым трэба ўлічваць, што "Беллегпрам" паказаў на камплекты адпускныя цэны з ПДВ без гандлёвай надбаўкі крам.
Па словах Святланы Кахро, форма з кожным годам удасканальваецца з улікам тых заўваг і прапаноў, якія выказваюць бацькі і самі школьнікі, а таксама Міністэрства адукацыі. "Напрыклад, цяпер прапануюцца мадэлі з выкарыстаннем трыкатажных палотнаў, каб яны не абмяжоўвалі рух, выкарыстоўваецца спалучэнне розных фактур тканін, нятканыя матэрыялы, стеганые, каб разнастаіць вопратку дзелавога стылю для школьнікаў", — адзначыла яна.
Да новага навучальнага года прадпрыемствы канцэрна прапануюць 350 новых мадэляў школьнай формы, 150 мадэляў будуць выпушчаныя паўторна, паколькі яны больш за ўсё спадабаліся пакупнікам і былі запатрабаваныя.
У мінулым годзе "Беллегпрам" выпусціў звыш 550 тысяч швейных і больш за 350 тысяч трыкатажных вырабаў. Школьнікі маглі выбраць камплект школьнай формы больш чым з 700 мадэляў.
