МІНСК, 10 жні — Sputnik. Прэзідэнт Беларусі Аляксандр Лукашэнка павіншаваў футбалістаў "Дынама-Мінск" з перамогай "Зяніта" з Санкт-Пецярбурга ў Лізе Еўропы, расказаў галоўны трэнер мінчан Сяргей Гурэнка.
У чацвер мінскае "Дынама" на сваім полі атрымала перамогу над "Зянітам" у рамках трэцяга раўнда кваліфікацыі Лігі Еўропы УЕФА з лікам 4:0. Паядынак у адказ пройдзе 16 жніўня на стадыёне "Пятроўскі" ў Санкт-Пецярбургу.
"Пасля матчу тэлефанавалі з кабінета прэзідэнта. Ён павіншаваў усіх з гэтай перамогай", — сказаў Гурэнка, словы якога прыводзіць РІА "Новости".
Заслужаная перамога
Настаўнік мінчан распавёў, што ў першым тайме гаспадары імкнуліся "адсунуць" гульню ад сваіх варот, а ў другім — задача была не прапусьціць. "Разумелі, што "Зяніт" кіне ўсе сілы ў атаку, каб забіць. Наша каманда справілася і атрымала заслужаную перамогу", — дадаў ён.
Разам з тым, паводле слоў Гурэнкі, рана казаць пра тое, што мінчане выйшлі ў плэй-оф кваліфікацыі ЛЕ. "Нас чакае вельмі складаны матч у адказ. Шкада, што ён пройдзе пры пустых трыбунах, футбол існуе для гледачоў, а іх адсутнасць будзе праблемай для абедзвюх каманд", — працягнуў ён.
Гурэнка дадаў, што госці гулялі нядрэнна. Таксама ён адзначыў, што не варта абвінавачваць у паражэнні брамніка "Зяніта" Юрыя Ладыгіна, які праводзіў першы матч у сезоне.
"Цяжка было прадбачыць склад "Зяніта" на гульню. Першы гол яшчэ можна спісаць на памылку брамніка, але ў астатніх яго віны няма. Не варта вінаваціць Ладыгіна", — сказаў трэнер.
