МІНСК, 14 жні — Sputnik. Многія пладовыя дрэвы зноў расцвілі ў Беларусі ў жніўні, паведаміў Sputnik старшы навуковы супрацоўнік Інстытута эксперыментальнай батанікі НАН Беларусі Аркадзь Скуратовіч.
Надвор'е ў рэспубліцы ў гэтым годзе падносіць сюрпрызы: пасля працяглай засухі прайшлі праліўныя дажджы, затым усталявалася гарачае надвор'е. У выніку ў жніўні паўторна зацвілі некаторыя пладовыя дрэвы.
"Сапраўды, у многіх зацвілі яблыні, грушы, вішні… Гэта адбываецца з-за надвор'я — расліны ў засуху ўпадалі ў свайго роду анабіёз, а пасля дажджоў падумалі, што зноў прыйшла вясна. У раслін няма вачэй, таму яны не могуць праверыць", — растлумачыў Скуратовіч.
Паводле слоў спецыяліста, паўторнае цвіценне небяспечна: расліна на яго марнуе тыя рэсурсы, якія былі адкладзеныя на наступную вясну.
"Кветкі неабходна абрываць, каб расліны не трацілі запасы. Інакш у тых дрэў, якія адцвілі, вясной будзе менш пладоў", — папярэдзіў суразмоўца агенцтва.
Нават калі даць магчымасць дрэвам адцвісці, адзначыў Скуратовіч, на "другі паток" пладоў разлічваць не варта: завязацца яны могуць, але даспець дакладна не паспеюць. А дрэвы, у сваю чаргу, да наступнага года наўрад ці змогуць зноў назапасіцца неабходнымі рэчывамі для багатага ўраджаю.
