МІНСК, 15 жні — Sputnik. Спецыялісты "Яндэкс" высветлілі, якімі ВНУ Беларусі больш за ўсё цікавіліся абітурыенты гэтым летам, паведамілі ў прэс-службе кампаніі ў сераду.
Па дадзеных аналітыкаў, асабліва цікавасць беларускіх абітурыентаў да айчынных ВНУ ўзрасла ў пікавы месяц паступленняў — ліпень: у гэты час да тэмы паступлення ва ўніверсітэты праявілі нават больш цікавасці, чым да Чэмпіянату свету па футболе.
У тройцы лідараў топ-10 беларускіх ВНУ, да якіх асабліва ўзрасла цікавасць у ліпені 2018-га — Беларускі дзяржаўны эканамічны ўніверсітэт (БДЭУ), Віцебскі дзяржаўны медыцынскі ўніверсітэт (ВДМУ) і Гомельскі дзяржаўны медыцынскі ўніверсітэт (ГГМУ).
Сталічны медуніверсітэт апынуўся на чацвёртым месцы, пятае заняў Беларускі дзяржаўны ўніверсітэт транспарту (БелДУТ), а ўніверсітэт інфарматыкі і радыёэлектронікі (БДУІР) апынуўся толькі на шостай пазіцыі.
У дзесятку ўвайшлі таксама Гродзенскі дзяржаўны медыцынскі ўніверсітэт (ГрДМУ), Беларускі дзяржаўны ўніверсітэт (БДУ), Беларускі нацыянальны тэхнічны ўніверсітэт (БНТУ) і Мінскі дзяржаўны лінгвістычны ўніверсітэт (МДЛУ).
Цікава, што на год раней статыстыка была іншай: на першым месцы па запытах у Яндэксе за ліпень 2017 года быў БДУ, а на другім — БНТУ, якія ў гэтым годзе толькі замыкаюць дзесятку. БДУІР у мінулым годзе быў восьмым, а МДЛУ і зусім не трапіў у топ-10.
Таксама беларусы часта шукалі інфармацыю пра актуальныя прахадныя балы ў айчынныя ўніверсітэты, сертыфікаты ЦТ і задавалі "Яндэксу" галоўнае пытанне — куды паступаць.
