МІНСК, 25 жні — Sputnik. Беларуская спартсменка Арына Сабаленка (25-я ў сусветным рэйтынгу) выйшла ў фінал турніру катэгорыі "Прэм'ер" у амерыканскім Нью-Хейвене.
Прызавы фонд спаборніцтваў складае 776 тысяч долараў.
У паўфінале Сабаленка сустракалася з дзевятай ракеткай свету — немкай Юліяй Гергес. Паядынак працягваўся 1 гадзіну 45 хвілін, мацнейшай аказалася беларуска — 6:4, 7:6 (7:3).
Сабаленка зрабіла тры брэйкі, адзін эйс і адну двайную памылку. Саперніца выйграла дзве падачы на прыёме, зрабіла пяць эйсаў і шэсць двайных памылак.
Гэтая асабістая сустрэча стала другой для спартсменак, у папярэдні раз таксама мацнейшай аказалася Сабаленка.
У фінале беларускай тэнісістцы трэба будзе згуляць з 30-м нумарам сусветнага рэйтынгу — іспанкай Карлай Суарэс Навара. Спартсменка выйшла ў вырашальны паядынак пасля таго, як ад барацьбы адмовілася прадстаўніца Пуэрта-Рыка Моніка Пуіг. Пры ліку 4:4 у першай партыі паўфіналу яна знялася з турніру з-за траўмы мышц жывата. Пуіг — алімпійская чэмпіёнка Рыа-2016.
