МІНСК, 11 вер — Sputnik. На галоўнай старонцы пошукавага сэрвісу yandex.by з'явіліся даступныя для прагляду ліцэнзійныя фільмы і серыялы, паведамілі Sputnik у прэс-службе кампаніі.
Як распавялі прадстаўнікі "Яндэкса", беларусы могуць глядзець свежае кіно бясплатна і ў высокай якасці: зараз на галоўнай старонцы адлюстроўваюцца серыялы, фільмы, анімацыйныя стужкі і класіка савецкага кіно.
"На бягучы момант мы ліцэнзавалі больш за тры тысячы фільмаў і паступова будзем павялічваць нашу калекцыю. У далейшым гэты кантэнт будзе даступны не толькі на галоўнай старонцы беларускага "Яндэкса", але і на іншых пляцоўках, у прыватнасці, на Тэлепраграме", — распавёў Ягор Цыганок, рэгіянальны менеджэр па развіцці "Яндэкса" ў Беларусі.
У прэс-службе кампаніі таксама патлумачылі, што ўсе фільмы сабраны ў падборкі розных жанраў, для кожнага з іх паказаны рэйтынг сэрвісу "Кинопоиск". Для пачатку прагляду дастаткова аднаго кліку, а пры закрыцці ўкладкі са стужкай пазней можна вярнуцца да прагляду з таго ж месца.
