МІНСК, 13 вер — Sputnik. Беларусь зноў увайшла ў рэйтынг найменш эмацыйных краін свету, сведчаць дадзеныя даследавання Global Emotions 2018, праведзенага амерыканскім цэнтрам Гэлапа.
Рэспубліка ўжо не першы год аказваецца ў ліку найменш эмацыйных краін свету. Паводле дадзеных апошняга даследавання, лепш з эмоцыямі ў беларусаў не стала — краіна зноў апынулася ў лідарах самых неэмацыйных.
Акрамя беларусаў, у лік самых неэмацыйных таксама патрапілі грэнландцы, йеменцы і азербайджанцы. Рэспандэнты з гэтых краін у большасці сваёй адказвалі, што не адчувалі моцных эмоцый за апошнія суткі — ні негатыўных, ні станоўчых. З чым гэта звязана, даследчыкі не ведаюць.
У лідарах і па ўзроўні эмацыйнасці, і па колькасці пазітыўных эмоцый — многія краіны Лацінскай Амерыкі, а таксама Канада, Ісландыя, Узбекістан і Інданэзія. Пра негатыўныя перажыванні часцей казалі жыхары ЦАР, Ірака, Паўднёвага Судана, Чада і Сьера-Леонэ.
Беларусы апынуліся ў ліку краін, якія рэдка згадвалі пра негатыўныя эмоцыі. Згадак пра станоўчыя пачуцці было больш, аднак менш, чым у іншых краінах.
Даследаванне аб ступені эмацыйнасці праводзілася ў 2017 годзе метадам тэлефоннага апытання або інтэрв'ю тварам да твару. Апытаныя былі больш за 154 тысяч чалавек, старэйшых за 15 гадоў, з 145 краін свету. Дакладнасць апытання, як сцвярджаюць у цэнтры Гэлапа, складае 95%.
