Тыдні Германіі пройдуць у Беларусі ў пятнаццаты раз — з 23 верасня па 18 лістапада. Праграма мерапрыемстваў — у аглядзе Sputnik.
Арганізатары абяцаюць кінапаказы, розныя канцэрты, выставы і запамінальныя майстар-класы. Адны з самых інтрыгуючых мерапрыемстваў гэтага года — форумы па энергетыцы і ўрбаністычнай архітэктуры, якой славіцца Германія.
Музыка
Культурная праграма гэтага года пачнецца з канцэрту камернай музыкі ў нядзелю, 23 верасня, у 19:00. Месца правядзення — Беларуская дзяржаўная філармонія.
Канцэрты камернага хору Collegium Musicum пры падтрымцы царкоўнага хору Св. Міхала адбудуцца першага і трэцяга кастрычніка.
Акустычны канцэрт гурта Solche пройдзе ў пачатку лістапада і прадэманструе суладнае спалучэнне танцавальнай рок-музыкі і глыбокіх тэкстаў.
Берлінскі фестываль XJAZZ стане доўгачаканым і заключным мерапрыемствам Нямецкага тыдня 2018 у Мінску. Ён прагучыць у тры этапы — з 15 па 18 лістапада.
Кіно
Факультэт міжнародных адносін БДУ расчыніць свае дзверы 4 кастрычніка. У 18:30 там адбудзецца фестываль кароткаметражнага кіно "Shorts at Moonlight". Лепшыя нямецкія кароткаметражкі будуць паказвацца гледачам на працягу двух вечароў.
Прэм'ера дакументальнага фільма пра вязня канцлагера Бухенвальд адбудзецца ў пятніцу, 5 кастрычніка, у гістарычнай майстэрні імя Левіна. Рэжысёр фільма Ханес Фарлок наведае кінапаказ асабіста і зможа адказаць на пытанні гледачоў.
Акрамя гэтага, запланаваны вечары кароткаметражнага кіно "SHORT EXPORT 2018", вечары нямецкага кіно ў кінатэатры "Піянер" і многае іншае.
Урбаністычны форум і энергетычная канферэнцыя
Канферэнцыя па аднаўляльнай энергетыцы пройдзе 9 і 10 кастрычніка. У рамках канферэнцыі запланаваны выступленні маладых экспертаў Беларусі і Германіі.
Урбаністычны форум пачнецца 10 кастрычніка ў 10:00. Удзельнікі форуму змогуць распрацаваць планы развіцця тэрыторыі Трактарнага завода ў рамках Школы гарадскога актывіста.
Акрамя гэтага, гасцей чакаюць цікавыя выставы, тэатральныя фестывалі, аўтарскія чытанні, майстар-класы і лекцыі. Падрабязная праграма мерапрыемстваў — на сайце пасольства Германіі.
