МІНСК, 2 кас — Sputnik. Беларускія школы з 1 студзеня 2019 года будуць фінансаваць па-новаму, заявіла ў аўторак журналістам начальнік аддзела аплаты працы і нармавання штатнай колькасці галоўнага ўпраўлення эканомікі адукацыі Мінадукацыі Наталля Крывалапава.
Некаторыя беларускія школы ўжо некалькі гадоў фінансаваліся па новай сістэме ў рамках эксперыменту. Кіраўнікі ж устаноў адукацыі атрымлівалі магчымасць зэканомленыя грошы накіроўваць на стымуляванне працы педагогаў. Як стала вядома ў аўторак, эксперымент прызнаны паспяховым — такую методыку прымуць ва ўсёй краіне.
"Плануецца, што з 1 студзеня ўсе ўстановы агульнай сярэдняй адукацыі пяройдуць на новы метад фінансавання, які будзе складацца ў тым, што яны будуць атрымліваць фінансаванне па нарматыве з разліку на аднаго вучня", — паведаміла журналістам Крывалапава.
Такая сістэма, упэўнены чыноўнікі, дазволіць забяспечыць празрыстасць і справядлівасць фінансавання. Адбудзецца не аптымізацыя выдаткаў, а пераразмеркаванне фінансавых сродкаў.
"Зараз у нас існуе каштарыснае фінансаванне: разлік зарплаты ідзе ад колькасці класаў у школе і ніяк не залежыць ад колькасці вучняў у ёй, а ў класе можа быць і 30, і 15, і пяць чалавек. Фінансаванне, якое залежыць ад колькасці вучняў, паставіць установы адукацыі ў роўныя ўмовы", — упэўненая прадстаўнік міністэрства.
З 2016 года падобную сістэму фінансавання школ апрабавалі таксама на сталічных установах агульнай сярэдняй адукацыі, то бок методыка абсалютна новай і нечаканай для сістэмы не будзе.
Усяго ў рэспубліцы налічваецца больш за тры тысячы ўстаноў агульнай сярэдняй адукацыі, у іх навучаецца звыш мільёна чалавек. Працуюць у сферы каля 119 тысяч педагогаў, у тым ліку 99 тысяч настаўнікаў.
