"Малахаў +", "Модны прысуд", "Кантрольная закупка" — гэтыя тэлепраекты добра знаёмыя шырокай аўдыторыі. У студыі радыё Sputnik Беларусь, тэлепрадзюсар і рэжысёр шэрагу гучных праектаў "Грамадскага расійскага тэлебачання" Ларыса Крыўцова абмяркоўвае з вядучымі карысць і шкоду такога тэлевізійнага жанру, як ток-шоу, неабходнасць вучыць і выхоўваць тэлегледачоў, а таксама магчымасці вярнуць цікавасць да класічнай літаратуры і што цікавага расіянам можна зняць у Беларусі.
"Я абвінавачваю сябе ў тым, што адбываецца сёння на тэлебачанні. Некалі мы запусцілі працэс "дэбілізацыі" ТБ. Раней тэлебачанне было вельмі правільнае, рэгламентаванае, вельмі рафінаванае. І раптам гэта ўсё абвалілася. Усё перастала працаваць не толькі на тэлебачанні, але і ў краіне. Людзі разгубіліся, таму што ў іх была звычка, што за іх хто-небудзь што-небудзь вырашае. Партыя, прафсаюзы… Да 90-х гадоў у нас ніякіх ток-шоу не было. Спрабаваў Познер рабіць тэлемасты. І вось паўстала ідэя зрабіць такую праграму, каб людзі прыйшлі ў студыю, каб пра нешта пагаварыць, і магчыма, тэлебачанне заменіць тыя органы ўлады, якія могуць ім дапамагчы нешта вырашыць", — распавядае Крыўцова.
Па словах тэлепрадзюсараў, пэўны час "псіхалагічным клапанам" для гледачоў была праграма "Добры вечар, Масква!", калі рэпарцёры разам з мясцовай вертыкаллю сапраўды вырашалі надзённыя праблемы грамадзян. Але, на жаль, гэты перыяд быў нядоўгім, паколькі "разам з адкрыццём клапана ў катле грамадскага напружання з парай вылецеў і джын, і наступствы даводзіцца расхлёбваць да гэтага часу".
Як кажа Крыўцова, сёння на ТБ усім хочацца "капацца ў бруднай бялізне", а аб добрым казаць не хочуць, пры гэтым узровень тэлеглядзення працягвае падаць, і ў гэтым суразмоўца Sputnik прызнае і сваю віну. Менавіта таму сёння хочацца займацца праграмамі, якія будуць адукаваць гледачоў, і арыентаваць такія праекты на моладзь.
"Я не спрабую іх вярнуць да тэлевізара, я спрабую абудзіць цікавасць праз тэлевізар да іншых рэчаў, напрыклад, да класічнай рускай літаратуры. Гэты праект называецца "Сюжэтны ход": мы бярэм вядомы твор — Дастаеўскі, Талстой, Астроўскі — усё, што маладняк звычайна цярпець не можа, мы бярэм месца, дзе адбываецца дзеянне, і апускаем у яго сучаснага чалавека, напрыклад, "руфер" ходзяць па даху дома, дзе Раскольнікаў забіў старую", — распавядае Крыўцова.
Поўную версію размовы з прадзюсарам і вядучай расійскага "Першага канала", кіраўніком медыяпраектаў "Горад жанчын" Ларысай Крыўцовай у студыі радыё Sputnik Беларусь глядзіце на відэа.
Радыё Sputnik Беларусь выказвае падзяку Міжнароднаму медыя-клубу "Фармат А3" за магчымасць запісу інтэрв'ю.
