Нацыянальны касцюм і кактэйльную сукенку прадэманстравала журналістам беларуская прыгажуня Марыя Васілевіч. Прэзентацыя прайшла ў Нацыянальнай школе прыгажосці.
Адзін з самых эфектных выхадаў на конкурсе "Міс свету", які пройдзе 8 снежня ў кітайскім горадзе Санья, — гэта выхад у нацыянальных касцюмах. Дызайнер Дар'я Мугака вырашыла здзівіць традыцыйнай беларускай "сувенірнай лялькай".
У строі дызайнера мноства лёгкіх валанаў з багатымі карункамі, нябесна-блакітных вышывак. Спадніца, выкананая з беларускага ільну, пераходзіць у шлейф і сімвалізуе фартух.
Па задумцы, калі беларуская прыгажуня будзе выконваць народны танец на сцэне, спадніцу пакароцяць да калена, каб яна не скоўвала руху.
Галаўны ўбор, над якім працавала дызайнер аксесуараў Кацярына Плавінская, упрыгожаны васількамі і каласамі. А туфлі з мяккай замшы на невысокім абцасе пашылі ў кампаніі Studio Sutoria.
Яшчэ адну сукенку, якую прымерыла Марыя Васілевіч, падрыхтавалі ў модным доме "Papilio" для намінацыі "Міс топ-мадэль".
"Сукенка яркая і фактурная, — лічыць крэатыўны дырэктар "Papilio". — У ёй прысутнічаюць прыгожы графічны сілуэт і раскошныя вышыўкі. Праз чорны лёгкі вэлюм злёгку прасвечваюць ножкі і пры гэтым мадэль даўжынёй у падлогу".
Сукенка выканана з чорнага цюлю і тафты, вышытае лісце ўпрыгожана пацеркамі. Расшыўка ідзе і па ліфу.
Таксама на прэзентацыі паказалі эскіз сукенкі для фінальнага выхаду, над якой працуе дызайнер Юлія Латушкіна.
Для стварэння гэтай сукенкі будзе выкарыстаная глітэрная тканіна з пераходам ад бірузовага да сіняга. Па словах дызайнера, "матэрыял будзе блішчэць і пералівацца россыпам, што створыць вельмі прыгожы і незабыўны эфект на сцэне". Пры гэтым, дадае яна, "атрымаецца прыгожы, запамінальны і вытрыманы стыль".
