ГРОДНА, 16 кас - Sputnik, Іна Грышук. Убачыць гарадскую ратушу, адну з самых вялікіх ва Усходняй Еўропе сінагог або наваградскі палац Радзівілаў зараз зможа кожны жадаючы - міні-музей пад адкрытым небам, які сабраў назаўжды страчаныя помнікі архітэктуры, з'явіўся ў Наваградку.
Міні-музей пад назвай "Страчаная спадчына" размясціўся на пляцоўцы ў самым пачатку па вуліцы Міцкевіча ў цэнтры Наваградка і сабраў дакладныя копіі помнікаў архітэктуры раёна, якія былі назаўжды разбураныя. Усе макеты зроблены рукамі наваградскіх школьнікаў.
Тут можна ўбачыць, як выглядала гарадская ратуша, якая размяшчалася ў самым цэнтры горада, ці Замкавая царква, у якой больш за 500 гадоў таму праводзіліся пасяджэнні вышэйшага апеляцыйнага суда ВКЛ. З цікавых экспанатаў - езуіцкі калегіум, які існаваў у Наваградку ў XVIII стагоддзі і займаў тэрыторыю плошчай у некалькі гектараў. А таксама адна з самых вялікіх ва Усходняй Еўропе сінагог, яе ў Наваградку зруйнавалі ў 70-я гады мінулага стагоддзя.
З цікавасцю госці музея разглядаюць і ветраны млын. Каб зрабіць гэта збудаванне, мясцовыя жыхары пераабсталявалі адну з вежаў малога замка, гэты помнік архітэктуры існаваў па 1999 год.
На пляцоўцы размясціліся макеты некалькіх вялікіх жылых сядзіб. Гэта палац Радзівілаў, які стаяў у цэнтры Наваградка насупраць касцёла Святога Міхаіла і быў разбураны на пачатку Другой сусветнай, калі ў яго трапіла бомба. Побач - сядзібны домік Карповічаў з вёскі Чамброва, менавіта тут пазнаёміліся бацькі Адама Міцкевіча. Незвычайна выглядае і дом О'Руркаў з Усялюба, які згарэў у 2012 годзе.
З захаваных да нашых дзён помнікаў у міні-музеі прадстаўлены сядзібна-паркавы ансамбль роду Брахоцкіх у вёсцы Вераскава. Міні-музей можа наведаць кожны жадаючы цалкам бясплатна. Гараджане і турысты паспелі ацаніць новае месца для шпацыраў, з цікавасцю разглядаюць макеты і даведаюцца пра незвычайныя факты з гісторыі горада
