МІНСК, 28 кас - Sputnik. Памятны знак ва ўрочышчы Курапаты будзе ўсталяваны да канца года, заявіў у эфіры АНТ намеснік старшыні ФПБ Аляксандр Мікша.
"Падмурак пад знак ужо выраблены. Сёння ў майстэрнях горада робіцца сам знак, адліваецца звон. І ў бліжэйшы час ён будзе выраблены", - заявіў намеснік старшыні ФПБ.
У суботу актывісты ФПБ правялі ў Курапатах суботнік. Ён нагадаў, што ФПБ ужо трэці год праводзіць суботнікі ў Курапатах. У гэты раз прафсаюзныя актывісты прыбіралі сухія і паваленыя дрэвы, галінкі - добраўпарадкоўвалі тэрыторыю перад устаноўкай памятнага знака.
Пра ўрочышча Курапаты, як пра месца расстрэлу ахвяраў палітычных рэпрэсій у 30-ыя гады ХХ стагоддзя, загаварылі ў канцы 80-х. У 90-я ва ўрочышчы працавалі археолагі, аднак поўнамаштабны даследчы праект, які мог бы даць адказы на ўсе пытанні пра гісторыю гэтага месца, завершаны не быў.
Да гэтага часу памяць аб пахаваных тут людзях была ўвекавечана невялікім каменем, недалёка ад якога стаіць мармуровая лаўка, падораная амерыканскім прэзідэнтам Білам Клінтанам.
Падчас візіту ў Беларусь ён наведаў і Курапаты. Акрамя таго ў памяць аб загінуўшых ва ўрочышчы актывісты апазіцыйных партый і рухаў ўсталявалі крыжы.
Паўтара гады таму Павел Якубовіч, на той момант галоўны рэдактар газеты "СБ. Беларусь сегодня", звярнуўся ў Адміністрацыю прэзідэнта з просьбай падтрымаць ідэю стварэння агульнанацыянальнага мемарыяла ў Курапатах. Пасля гэтага Міністэрства культуры абвясціла конкурс, і з часам быў абраны пераможца.
