МІНСК, 2 ліс - Sputnik. Лепшыя беларускія медыкі працуюць з Народным артыстам СССР Ігарам Лучанком, паведамілі Sputnik у пятніцу ў Міністэрстве аховы здароўя рэспублікі.
У Народнага артыста СССР і Беларусі, вядомага кампазітара Ігара Лучанка ў пятніцу здарыўся інсульт. Ён быў дастаўлены ў сталічную бальніцу хуткай медыцынскай дапамогі.
У Міністэрстве аховы здароўя Беларусі пацвердзілі факт шпіталізацыі кампазіта.
"З Ігарам Міхайлавічам працуюць лепшыя ўрачы краіны", - падкрэсліла Sputnik прэс-сакратар Міністэрства аховы здароўя Юлія Барадун.
Лучанок праславіўся як кампазітар песеннага жанру, хоць стварыў шмат класічных прац. У свой час ён напісаў нямала песень для "Песняроў", "Сяброў", "Верасоў", Іосіфа Кабзона, Сафіі Ратару, Валянціны Талкуновай, Марыі Пахоменка, Льва Лешчанкі, Эдуарда Хіля, Віктара Вуячыча і іншых музыкаў.
Кампазітар з'яўляецца ўладальнікам званняў Народнага артыста СССР і Беларусі, таксама ён быў узнагароджаны Ордэнам Францыска Скарыны, медалём ЮНЕСКА "Пяць кантынентаў", Ордэнам Дружбы Народаў і мноствам іншых узнагарод.
