МІНСК, 23 ліс - Sputnik. Прэзідэнт Беларусі Аляксандр Лукашэнка раскрытыкаваў тыпавое праектаванне сацыяльных аб'ектаў, пра гэта ён выказаўся на рэспубліканскім семінары-нарадзе аб павышэнні эфектыўнасці будаўнічага комплексу ў пятніцу.
"Не трэба зацыклівацца на тыпавым праектаванні і будаваць усё аднолькавае", - акцэнтаваў увагу беларускі лідар.
На думку Лукашэнкі, тыпавымі могуць быць прамысловыя будынкі, такія як трансфарматарныя падстанцыі або кацельні.
"Але дзіцячыя сады, школы і іншыя сацыяльныя аб'екты павінны быць арыгінальнымі", - падкрэсліў кіраўнік дзяржавы.
Ён таксама адзначыў, што тыпавымі ў сацаб'ектаў могуць быць толькі тэхналогіі, асобныя элементы канструкцыі, дэталі, з якіх яны сабраныя.
"І паўтараю: усё павінна патанаць у зеляніне і кветках", - запатрабаваў кіраўнік дзяржавы.
Таксама Лукашэнка адмоўна ацаніў якасць і тэрміны распрацоўкі праектнай дакументацыі: на яго думку, праектаванне часта займае не месяцы, а расцягваецца на некалькі гадоў.
Па словах прэзідэнта, палова аб'ектаў з тых 8 тысяч, што цяпер будуюцца ў Беларусі, перавышаюць нарматыўны тэрмін, часцей за ўсё з-за ўнясення пастаянных карэкціровак.
"Прыміце неабходныя меры па павышэнні адказнасці распрацоўшчыкаў за якасць праектнай дакументацыі і тэрміны яе падрыхтоўкі", - падсумаваў Лукашэнка.
