МІНСК, 29 ліс - Sputnik. Міністр працы і сацыяльнай абароны Беларусі Ірына Касцевіч адзначае неабходнасць вывучэння ў школах прадмета аб паўнавартаснай сям'і, пра гэта яна заявіла журналістам у чацвер у Менску перад пачаткам Калядных чытанняў.
Сёння ў Нацыянальнай бібліятэцы Беларусі пачаўся двухдзённы форум, які традыцыйна напярэдадні Калядаў праводзіць Беларускі экзархат. Перад пачаткам мерапрыемства прадстаяцель БПЦ мітрапаліт Мінскі і Заслаўскі Павел уручыў Касцевіч грамату ў сувязі са стагоддзем з дня ўтварэння структуры сацыяльнай абароны Беларусі. Ад праваслаўнага духавенства міністру Касцевіч паднеслі вялікі букет белых ружаў.
"Дзеці павінны разумець, што шчасце можна здабыць толькі ў сям'і. Паміж двума гэтымі паняццямі можна паставіць знак роўнасці", - заявіла журналістам кіраўнік Мінсацабароны, адказваючы на пытанне аб ініцыятыве ўвядзення ў школьную праграму прадмета "сям'язнаўства".
Паводле яе слоў, зацікаўленыя ведамствы "ўжо ўступілі ў дыялог", каб максімальна развіваць гэты кірунак.
Міністр адзначыла, што спачатку гаворка можа ісці пра такі факультатыў у 10-11 класах.
Адзначаючы важнасць супрацоўніцтва з Праваслаўнай царквой па іншых напрамках, кіраўнік ведамства адзначыла, што ў краіне ёсць больш за 80 дамоў-інтэрнатаў для пажылых адзінокіх людзей, і ў кожным з іх ёсць капліца. Паводле яе слоў, вельмі важна, каб людзі не былі самотнымі.
Перад пачаткам Калядных чытанняў Мітрапаліт Павел і першы намеснік міністра аховы здароўя Беларусі Дзмітрый Піневіч падпісалі пагадненне аб супрацоўніцтве.
Прадстаяцель БПЦ адзначыў "важнасць супрацоўніцтва" царквы і медыкаў у пытаннях духоўнай дапамогі цяжка хворым людзям.
