МІНСК, 3 сне - Sputnik. Праект указа аб выплаце зарплаты бюджэтнікам прадставілі прэзідэнту Беларусі, сказаў першы віцэ-прэм'ер Аляксандр Турчын.
Паводле яго слоў, нічога надзвычайнага не адбудзецца, таму што дакумент прадугледжвае эвалюцыйны характар змены ўмоў выплаты зарплаты бюджэтнікам.
"Мы мяркуем, што ўказ уступіць у дзеянне з 1 студзеня 2020 года, 2019 год - гэта падрыхтоўчы перыяд", - цытуе Аляксандра Турчына БелТА.
У краіне дзейнічае архаічная сістэма прызначэння і выплаты заробкаў бюджэтнікам. Цяпер яна складаецца з акладу, дадатковых выплат і ўсялякіх заахвочванняў, якіх можна налічыць больш за дваццаць.
"Часам нават не столькі самому работніку, колькі бухгалтару, прафесіяналу ў гэтай справе, вельмі складана зразумець усю сістэму фарміравання заработнай платы", - канстатаваў першы віцэ-прэм'ер.
Таму новы ўказ закліканы сфарміраваць зразумелую сістэму прызначэння зарплаты бюджэтнікам, так, каб аклад складаў 50-60% стабільнай яе часткі, а астатняе прыходзілася на надбаўкі. Пры гэтым будзе скарочана тарыфная сетка разрадаў і замест 27 іх стане 18.
"І паміж разрадамі будзе дыферэнцыяцыя каля 6%. Сёння за кошт таго, што мы ўздымалі зарплату розным катэгорыям работнікаў, узровень дыферэнцыяцыі паміж разрадамі складае менш за 1%, то бок стымулу рухацца ўверх па тарыфнай сетцы ніякага няма", - канстатаваў Турчын.
