МІНСК, 7 сне - Sputnik. У выхадныя, 8 і 9 снежня, у Беларусі будзе няўстойлівае надвор'е са снегам і дажджом, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
Па прагнозах сіноптыкаў, у суботу, 8 снежня, на большай частцы краіны чакаецца снег і мокры снег, у заходніх раёнах - з дажджом. Месцамі будзе туман. Таксама чакаецца галалёд, на дарогах галалёдзіца. Вецер парывісты. Ноччу тэмпература апусціцца да -2..-9°С, па захадзе рэспублікі - да -1..+1°С. Днём слупок у тэрмометра пакажа ад -4°С па ўсходзе да +6°С па захадзе краіны.
У нядзелю, 9 снежня, ноччу на большай частцы рэспублікі, а днём месцамі пройдзе мокры снег і дождж. У асобных раёнах краіны будзе туман. Захаваецца слабы галалёд, на дарогах галалёдзіца. Вецер ўмераны, днём парывісты. Ноччу мінімальная тэмпература паветра будзе -4..+2°С, у дзённыя гадзіны паветра прагрэецца да -2..+4°С.
У Мінску ў суботу ноччу будзе да -2°С, днём будзе каля 0°С. Будзе ісці мокры снег і дождж, хуткасць ветру будзе дасягаць 6-8 метраў у секунду.
У нядзелю ўначы ў сталіцы будзе без ападкаў, днём магчымы мокры снег і дождж. У начны і дзённы час слупок тэрмометра пакажа 0..+2°С. Вечарам магчымы парывісты вецер.
