МІНСК, 11 сне - Sputnik. Зарэгістраванае беспрацоўе на 1 снежня гэтага года склала 0,3% і скарацілася ўдвая ў параўнанні з мінулым годам, паведамілі ў прэс-службе Міністэрства працы і сацыяльнай абароны.
Беспрацоўных менш за жыхароў райцэнтра
Узровень беспрацоўя ў рэгіёнах склаўся наступным чынам:
- Брэсцкая, Віцебская, Гомельская, Гродзенская і Магілёўская вобласць - 0,4%;
- Мінская вобласць - 0,3%;
- Мінск - 0,1%.
Профільнае ведамства рапартавала, што на першае чысло бягучага месяца зарэгістравана ўсяго 14,2 тысячы беспрацоўных беларусаў, што на цэлыя 41,1% менш, чым на такую ж дату мінулага года, калі іх налічвалася 24,1 тысячы.
Зараз наймальнікі гатовы прадаставіць працу для 78,5 тысячы ахвотных, што больш на 41,1% у параўнанні з папярэднім перыядам, калі вакансій было ўсяго для 55,7 тысячы работнікаў. Праўда, перавага аддаецца рабочым прафесіям, на долю якіх прыпадае 64,8% прапаноў па працаўладкаванні.
Наогул за студзень-лістапад гэтага года з просьбай дапамагчы знайсці працу да чыноўнікаў звярнуліся больш за 191 тысячу беларусаў, прычым з іх больш за 109 тысяч былі пастаўленыя на ўлік.
Дзякуючы дзяржаўнай праграме на працу было ўладкавана больш за 140 тысяч беспрацоўных беларусаў, ці 74,1% ад колькасці тых, хто звярнуўся. Цікава, што ўлады нават здолелі на новае месца жыхарства і работы перасяліць 135 сем'яў беспрацоўных.
Дармаедаў - як жыхароў Гомеля
Міністэрства сацыяльнай абароны падлічвае не толькі колькасць беспрацоўных, але і тых беларусаў, якія не занятыя ў айчыннай эканоміцы, ці, папросту кажучы, дармаедаў. Для гэтага нават была створана спецыяльная база, куды збіраюцца дадзеныя на ўсіх беларусаў, якія не жадаюць працаваць на карысць радзімы. У пачатку гэтага месяца база пачала працаваць.
Дадзеныя каля 500 тысяч чалавек уключаны ў базу дадзеных працаздольных грамадзян, якія не занятыя ў эканоміцы, паведаміла беларусам з экранаў тэлевізараў міністр працы і сацыяльнай абароны Ірына Касцевіч.
Усе, хто патрапіў у гэтую базу, пачнуць з лютага 2019 года атрымліваць новыя жыроўкі на аплату паслуг ЖКГ, паколькі павінны будуць кампенсаваць поўны кошт паслуг.
Атрымліваецца, што ведамства пры наяўнасці ў краіне ўсяго 14 тысяч зарэгістраваных беспрацоўных здолела налічыць практычна 500 тысяч дармаедаў, гэта значыць тых, хто не працуе. Разрыў у падліках атрымліваецца проста каласальным. Беларускія чыноўнікі налічылі ў краіне дармаедаў столькі, што лічба адпавядае насельніцтву самага буйнога абласнога цэнтра - Гомеля.
