МІНСК, 16 сту - Sputnik. Прэзідэнт Беларусі Аляксандр Лукашэнка накіраваў віншаванні народнаму артысту СССР Васілю Ланавому, які сёння адзначае 85-годдзе, паведамілі ў прэс-службе кіраўніка дзяржавы.
"Вашы бліскучыя акцёрскія працы, якія адрозніваюцца высакароднасцю, сапраўднай мужнасцю і непераўзыдзенай унутранай годнасцю, сталі класікай савецкага і расійскага мастацтва, заслужылі прызнанне і шчырую любоў гледачоў розных пакаленняў", - гаворыцца ў віншаванні.
Аляксандр Лукашэнка ўпэўнены, што творчасць Васіля Ланавога і ў далейшым будзе дарыць людзям радасць, а таксама садзейнічаць умацаванню культурных сувязей паміж двума брацкімі народамі.
Прэзідэнт Беларусі пажадаў артысту здароўя, аптымізму, шчасця і дабрабыту.
Васіль Ланавы адсвяткуе 85-годдзе на сцэне роднага Вахтангаўскага тэатра, ён выступіць ў спектаклі "Прысвячэнне Еве", у якім выконвае ролю пісьменніка Абеля Знарко ўжо амаль 20 гадоў.
Акрамя сваіх роляў у тэатры і кіно, выбітны артыст вядомы і сваёй выкладчыцкай дзейнасцю. Ланавы больш за 16 гадоў працуе ў Шчукінскім вучылішчы, дзе перадае свой каласальны вопыт маладому пакаленню.
Заслугі акцёра адзначаны шматлікімі ўзнагародамі, у ліку якіх спецыяльны прыз прэзідэнта Беларусі "За захаванне і развіццё традыцый духоўнасці ў кінамастацтве" у лістападзе 2008 года.
