МІНСК, 18 сту - Sputnik. Правілы рэгістрацыі транспарту будуць спрошчаныя ў Беларусі з 21 студзеня, менавіта ў гэты дзень уступіць у сілу адпаведная пастанова Савета міністраў, пра гэта паведамілі ў прэс-службе МУС краіны.
У прыватнасці, з наступнага тыдня можна будзе здымаць з уліку транспартныя сродкі ў любым рэгістрацыйным падраздзяленні ДАІ незалежна ад месца яго рэгістрацыі. Акрамя таго, цяпер аўтасалоны змогуць рэгістраваць новыя аўтамабілі перад перадачай іх пакупніку. Гэта значыць, што ў аўтааматараў з'явіцца магчымасць з'ехаць з салона з новымі, а не транзітнымі нумарамі.
Згодна з пастановай, пасля ўвядзення ў дзеянне сістэмы электронных пашпартоў з 1 лістапада 2019 года пакупнікам не трэба будзе прадастаўляць для агляду новае аўто, набытае ў аўтасалоне.
Калі паўстане неабходнасць замяніць рэгістрацыйныя знакі з-за іх страты або крадзяжу, прадастаўляць транспартны сродак на агляд у ДАІ больш не трэба. У гэтым выпадку атрымаць новыя нумары можна будзе па акце агляду машыны, складзеным рэгістрацыйным падраздзяленнем па месцы знаходжання аўто, у тым ліку ў іншых дзяржавах.
У ДАІ адзначылі, што новыя правілы былі распрацаваны для таго, каб скараціць колькасць часу, які аўтамабілісты марнуюць на рэгістрацыйныя дзеянні, і ў цэлым спрасціць парадак рэгістрацыі транспарту.
