Вядомы фігурыст і трэнер, прызёр Алімпійскіх гульняў, чэмпіён свету і Еўропы, рэжысёр-пастаноўшчык папулярных лядовых шоу Ілья Авярбух падчас міжнароднага відэамаста павіншаваў Беларусь з правядзеннем Чэмпіяната Еўропы па фігурным катанні.
Па словах славутага спартсмена, гэта вельмі знакавы турнір, які ўваходзіць у лік топ-турніраў у свеце фігурнага катання, перамагчы ў якіх імкнуцца ўсе.
"Думаю, што Чэмпіянат Еўропы - гэта такі турнір "расійскі", мы вельмі часта перамагаем у ім, не раз было, што і ва ўсіх чатырох відах атрымлівалі медалі, праўда, гэта было дастаткова даўно. Але магу сказаць, што расійскім фігурыстам будзе вельмі камфортна выступаць у Беларусі, гэта практычна як дома. Падтрымка будзе каласальнай", - адзначыў Авярбух.
Вядомы фігурыст чакае вельмі цікавага турніру ў Мінску. У прыватнасці, у мужчынскім адзіночным катанні будзе высокая еўрапейская канкурэнцыя ў сувязі з удзелам Хаўера Фернандэса, які заявіў, што мае намер выйграць гэты Чэмпіянат Еўропы і завяршыць кар'еру.
Што тычыцца жаночага адзіночнага катання, то тут асноўная надзея расіян звязана з імем Аліны Загітавой, кажа Авярбух. У парным катанні таксама традыцыйна моцныя расійскія фігурысты, але на думку суразмоўцы Sputnik, канкурэнцыю ім цалкам могуць скласці спартсмены з Францыі.
"Вельмі моцна дадаў сёлета французскі дуэт. Я думаю, што гэта будзе такая сур'ёзная бітва паміж двума расійскімі парамі - Тарасава - Марозаў і Забіяка - Энберт - і французскім дуэтам", - перакананы Авярбух.
111-ы чэмпіянат Еўропы па фігурным катанні на каньках пройдзе ў Мінску з 21 па 27 студзеня. На турніры будуць разыграны медалі ў чатырох традыцыйных відах: мужчынскім і жаночым адзіночным катанні, парным катанні і спартыўных танцах на лёдзе.
Фрагмент гутаркі з вядомым расійскім фігурыстам і трэнерам Ільёй Авярбухам слухайце ў аўдыёзапісе радыё Sputnik Беларусь.
