МІНСК, 24 сту - Sputnik. Першая ў Беларусі выстава карцін лідара гурта "Акварыум" Барыса Грабеншчыкова пройдзе ў Нацыянальным мастацкім музеі з 29 студзеня па 10 сакавіка.
Экспазіцыя "Татэмы Зімагораў" – гэта больш за трыццаць жывапісных прац Грабеншчыкова за апошнія гады. Выставы ўжо праходзілі ў Санкт-Пецярбургу, Маскве, Лондане і Нью-Ёрку пачынаючы з канца 80-х гадоў.
Наведвальнікі выставы змогуць не толькі паглядзець на творы мастацтва, але і атрымаць асалоду ад музыкі: экспазіцыйны рад будзе падтрыманы інструментальнай музыкай аўтара, якую ён напісаў спецыяльна для гэтага музейнага праекта.
Некаторыя свае песні Барыс Грабеншчыкоў запісвае на грошы, атрыманыя з продажу карцін, таму аматары яго творчасці змогуць набыць аўтарскія працы пасля выставы.
