МІНСК, 3 лют - Sputnik. Буры мядзведзь Трыстан, адзін з насельнікаў Мінскага заапарка, выйшаў са спячкі раней часу, пра гэта паведамілі ў эфіры тэлеканала СТБ.
Па словах спецыялістаў установы, у цяперашні час жывёла праводзіць дні ў дрымоце. Зрэдку мядзведзь пакідае сваю бярлогу. Убачыўшы Трыстана па-за яго "домам", спецыялісты спрабуюць накарміць звера мясам, садавінай або батонам, аднак ад ежы драпежнік пакуль адмаўляецца.
Такое ранняе абуджэнне мядзведзя многія інтэрпрэтуюць як сімвал хуткага надыходу вясны. Аднак, на думку супрацоўнікаў сталічнага заапарка, драпежнік так рана выйшаў з спячкі не толькі з-за плюсавай тэмпературы: віной таму таксама гарадскі шум і іншыя мясцовыя жыхары.
Дарэчы, у многіх заапарках розных краін па паводзінах мядзведзяў у першыя лютаўскія дні вызначаюць, ці доўгай будзе зіма: лічыцца, калі жывёла пакідае сховішча, то зіма не будзе доўгай (у адваротным жа выпадку драпежнік не выходзіць з бярлогі, а толькі высоўвае нос).
Буры мядзведзь Трыстан, адзін з самых буйных і небяспечных наземных драпежнікаў, жыве ў сталічным заапарку ўжо больш за дзесяць гадоў. Як правіла, у зімовую спячку ён апускаецца на пачатку снежня. Нагадаем, у мінулым годзе ён таксама прачнуўся раней за тэрмін з-за пацяплення.
