МІНСК, 21 лют - Sputnik. Беларускі бок працуе над ліквідацыяй праблемных момантаў пры падпісанні візавага пагаднення з ЕС і гатова на пэўныя кампрамісы, заявіў у чацвер у Мінску міністр замежных спраў Беларусі Уладзімір Макей.
Па словах кіраўніка МЗС, зараз працягваецца ўзаемадзеянне рэспублікі з еўрапейскімі партнёрамі па пагадненні аб спрашчэнні візавага рэжыму і па рэадмісіі.
"На жаль, існуюць пэўныя моманты, міма якіх беларускі бок прайсці не можа. Мы цяпер працуем над ліквідацыяй гэтых праблемных момантаў", - адзначыў Макей.
Пры гэтым ён падкрэсліў, што афіцыйны Мінск гатовы пры вырашэнні некаторых пытанняў пайсці на асобныя саступкі.
"Практыка знешнепалітычнай, знешнеэканамічнай дзейнасці Беларусі заўсёды кажа пра тое, што калі мы бачым, што тыя ці іншыя праблемы з'яўляюцца непераадольнай перашкодай, беларускі бок заўсёды выяўляе гатоўнасць да кампрамісу", - сказаў міністр.
Каментуючы рашэнне Савета Еўропы аб павелічэнні кошту шэнгенскай візы з 60 еўра да 80 еўра, якое можа адбыцца ўжо праз паўгода, Макей пажартаваў, што беларускім грамадзянам грошы на ўсялякі выпадак трэба прыгатаваць.
"Трэба заўсёды рыхтаваць еўра, даляры, як і рублі", - сказаў на заканчэнне ён.
Беларусь і Еўрасаюз вядуць кансультацыі па праектах пагадненняў аб спрашчэнні візавых фармальнасцяў і рэадмісіі з 2014 года. Раней у рэспубліцы неаднаразова заяўлялі, што пакет дакументаў практычна гатовы да падпісання, і яно можа адбыцца ўжо ў хуткім часе. У выпадку дасягнення пагаднення з ЕС шэнгенскія візы для грамадзянаў Беларусі, як чакаецца, будуць каштаваць усяго 35 еўра.
