МІНСК, 1 кас – Sputnik. Беларускі гурт Akute прэзентаваў свой пяты студыйны альбом, які называецца 'V'. Акрамя адметнага для гурта дыска-дэкаданса ў ім можна пачуць электроннае гучанне.
Над пятым альбомам рокеры з Магілёву працавалі каля года. У стварэнні васьмі трэкаў, якія ўвайшлі ў "V", працавалі і запрошаныя выканаўцы: Дзяніс Астапаў ("Грязь") зачытаў хіп-хоп у песні "Кома", а актрыса Мары Ле Гал агучыла французскі тэкст у кампазіцыі "Самая холодная".
Самі музыканты сцвярджаюць, што альбом напісаны не так, як усе астатнія.
"У альбоме шмат электронікі, якой раней у Akute не было, і гэта наш першы досвед працы з ёй. Альбом цалкам запісаны і зведзены намі на нашай студыі. Мы ўпершыню паспрабавалі сябе ў саўнд-дызайне і змаглі аформіць песні менавіта так, як яны гучалі ў нас у галаве", - адзначае Станіслаў Мытнік, вакаліст Akute.
Калабарацыя з "Грязью" - гэта першы сумесны трэк за 10 гадоў, які ўключаны ў альбом. Akute адзначаюць, што трэк атрымаўся арганічным, нягледзячы на тое, што гучыць на дзвюх мовах - беларускай і рускай.
У падтрымку альбома Akute зладзіць тур па Беларусі, які стартуе 12 красавіка ў Віцебску. Пачуць новае гучанне гурта ў жывым выкананні пасля змогуць Гомель, Магілёў, Мінск, Брэст і іншыя гарады.
