МІНСК, 9 кра - Sputnik. "Татальны дыктант-2019" 13 красавіка будуць пісаць людзі ў 336 гарадах за мяжой, а ў Расіі да акцыі далучыцца 800 населеных пунктаў, расказала падчас тэлемосту Мінск-Масква-Талін-Тбілісі ў мультымедыйным прэс-цэнтры Sputnik Беларусь кіраўнік фонду "Татальны дыктант" Вольга Рабкавец.
Чатыры гісторыі
"Татальны дыктант можна будзе напісаць па ўсім свеце. 336 гарадоў за мяжой, амаль 800 населеных пунктаў на тэрыторыі РФ. Мы стараемся даць магчымасць напісаць дыктант усім, хто яшчэ хоча далучыцца, хоць тут і засталося некалькі дзён", - патлумачыла Вольга Рабкавец.
Паводле яе слоў, у гэтым годзе пісаць пад дыктоўку зноў будуць на 6 кантынентах, у тым ліку палярнікі ў Антарктыдзе. Што тычыцца тэксту, то за яго яшчэ ў маі 2018 года ўзяўся рускі пісьменнік Павел Басінскі.
"Першы тэкст будзе прысвечаны Моцарту і Сальеры, другі "Мёртвым душам" Гогаля, трэці "На дне" Горкага і чацвёрты звязаны з дзяцінствам Талстога. З адным вельмі цікавым сюжэтам з яго дзяцінства. Мы з Вольгай неяк адразу дамовіліся, што тэксты будуць насіць даследчы характар", - сказаў Павел Басінскі.
Паводле яго слоў, у кожным тэксце, хоць ён і хрэстаматыйны для рускай літаратуры, ёсць загадка, для якой аўтар спрабуе прапанаваць сваю версію адгадкі.
Тут варта патлумачыць, што, улічваючы паясы на розных кантынентах, людзі будуць пісаць адно з чатырох апавяданняў. Так, публіцы ў Паўднёвай і Паўночнай Амерыцы дастанецца гісторыя пра дзяцінства Льва Талстога.
Дыктант у лесе
У 2019 да акцыі далучыліся тры новыя краіны - Перу, ААЭ і М'янма. Такім чынам, усяго ў дыктоўцы возьме ўдзел 81 краіна, уключаючы Расію. Сярод краін-лідараў па колькасці гарадоў-удзельнікаў Германія, дзе пісаць будуць у 20 населеных пунктах. У Кітаі і ЗША дыктоўка пройдзе ў 17 гарадах. А вось сталіцай сусветнай акцыі ў гэтым годзе стане эстонскі Талін. Тут свой тэкст будзе чытаць Павел Басінскі.
"Кампанію аўтару складуць трэнер зборнай Расіі па футболе Станіслаў Чарчэсаў, акцёр Кірыл К'яры. Таксама ў нас будуць цікавыя атмасферныя пляцоўкі. Першая - Брэменская вежа ў Старым горадзе, другая - у лесе. Паколькі і Эстонія і горад Талін вельмі зялёныя, экатурызм добра развіваецца ў нашай краіне", - распавяла лакальны каардынатар у Таліне Яна Каліністава.
Любімы дыктатар
У Беларусі дыктоўку напішуць у 13 гарадах. Праўда, не ў лесе: пісаць будуць у Бабруйску, Брэсце, Гомелі, Добрушы, Мазыры, Рэчыцы, Гродна, Магілёве, Полацку, Шчучыне. У гэтым годзе ёсць і новыя ўдзельнікі з Веткі і Салігорска.
"На сёння ў Беларусі зарэгістраваны 591 удзельнік. З іх 443 удзельнікі з Мінска", - прывяла статыстыку каардынатар "татальнага дыктанта" ў Мінску Яўгенія Долгіер.
Што да сталіцы, то тут будуць пісаць пад дыктоўку на 4 пляцоўках. У Нацыянальнай бібліятэцы тэкст прачытае акцёр Аляксандр Суцкавер. У медыцынскім універсітэце дыктатарствам традыцыйна зоймецца спявак і вядучы Георгій Калдун.
"Гэта любімая пляцоўка і любімы дыктатар усіх удзельнікаў. Георгій на хвалі з усімі ўдзельнікамі, вельмі цікава чытае, дадае свае каментары", - прызналася Яўгенія Долгіер.
Паводле яе слоў, яшчэ два месцы, дзе можна будзе напісаць тэкст, знаходзяцца ў навуковай бібліятэцы БНТУ і ў расійскім цэнтры навукі і культуры. Таксама ў беларусаў будзе магчымасць напісаць дыктоўку анлайн на сайце "Татальнага дыктанта" ў 14:00 і 23.00.
Тэст на пісьменнасць
Калі татальны дыктант толькі пачынаўся, у яго былі закладзеныя адразу некалькі сэнсаў. З аднаго боку ў такой справе важная пісьменнасць людзей, з другога боку знаёмства шырокай аўдыторыі з сучаснымі рускімі пісьменнікамі.
"Вядома, мы робім свята рускай мовы, абуджаем у людзях жаданне вучыцца, пазнаваць нешта новае", - заўважыла кіраўнік фонду "Татальны дыктант" Вольга Рабкавец.
Паводле яе слоў, гэта сусветны праект, які аб'ядноўвае ўсіх, хто ўмее ці хоча пісаць і гаварыць па-руску. 13 красавіка адукацыйная акцыя пройдзе ўжо ў 15-ы раз.
