МІНСК, 12 кра - Sputnik. Стаўкі падатку на валоданне сабакамі змяніліся ў Мінску, адпаведнае рашэнне Мінскага гарадскога Савета дэпутатаў размешчана ў пятніцу на Нацыянальным прававым інтэрнэт-партале.
Згодна з дакументам, за ўтрыманне сабакі, парода якой унесена ў пералік патэнцыйна небяспечных, трэба заплаціць адну базавую велічыню (25,5 рублёў). Падатак на гадаванцаў іншых парод, незалежна ад вышыні ў карку, усталявалі ў памеры 0,3 базавай велічыні (7,65 рубля).
Таксама ў новай рэдакцыі рашэння мінскага гарадскога Савета дэпутатаў паказана, хто вызваляецца ад выплаты падатку. У прыватнасці, плаціць не трэба мінчанам, якія пражываюць у аднакватэрных блакіраваных жылых дамах, калі пры гэтым яны трымаюць не больш за аднаго сабаку. Важна, што гэта паслабленне дзейнічае толькі ў тым выпадку, калі жывёла не выкарыстоўваецца ў прадпрымальніцкай дзейнасці.
Нагадаем, уладальнікі сабакі старэйшага за тры месяцы павінны рэгістраваць іх у ЖЭУ па месцы жыхарства і выплачваць падатак. Калі праігнараваць гэтае патрабаванне, можна атрымаць штраф да 15 базавых велічынь (382,5 рублі). Падатак на ўтрыманне сабак выплачваецца адзін раз у квартал разам з аплатай жыллёва-камунальных паслуг.
