МІНСК, 12 кра - Sputnik. Лепшай фатаграфіяй года па версіі World Press Photo прызнаны здымак амерыканскага фатографа Джона Мура.
Цырымонія ўзнагароджання лаўрэатаў конкурсу World Press Photo адбылася ў чацвер у Амстэрдаме.
Здымкам, які атрымаў безумоўную перамогу, стала фатаграфія Джона Мура з дзяўчынкай, якая плача. Супрацоўнік памежнай службы ЗША абшуквае маці малой Янелы - жыхарку Гандураса Сандру Санчэс на мяжы ЗША і Мексікі.
Па словах жанчыны, яна з дачкой месяц дабіралася да мяжы, каб папрасіць у ЗША прытулак. Але як раз у гэты час Трамп абвясціў палітыку "нулявой цярпімасці" - у адносінах да затрыманых на мяжы мігрантаў сталі ўжываць крымінальную адказнасць. Многія мігранты былі разлучаныя з сем'ямі, з дзецьмі.
Фотаздымак Мура стаў шырока вядомы ў свеце, і ўладам ЗША прыйшлося заявіць, што ў дадзенай гісторыі дачку не разлучалі з маці. Тым не менш грамадскія пратэсты прывялі да таго, што ў чэрвені мінулага года Трамп абвясціў аб адмене палітыкі "нулявой цярпімасці".
World Press Photo з'яўляецца самым прэстыжным міжнародным фотаконкурсам. Праводзіцца з 1955 года. У сёлетнім конкурсе журы разгледзела 79 тысяч здымкаў ад амаль 5 тысяч фатографаў са 129 краін свету. У лік лаўрэатаў і прызёраў увайшлі 43 фатографы з 25 краін.
