МІНСК, 16 кра - Sputnik. Буйны пажар у адной з галоўных славутасцяў сталіцы Францыі - саборы Парыжскай Божай Маці - патушаны, паведамляе газета Figaro са спасылкай на прадстаўніка пажарных службаў.
Пажар пачаўся вечарам у панядзелак.
У апошні час у базыліцы ішлі рэстаўрацыйныя работы, і будынак быў акружаны будаўнічымі лясамі. Менавіта з іх і пачалося ўзгаранне - полымя было зафіксавана ў 18:50 па мясцовым часе (19:50 па мінскім).
З сабора былі аператыўна эвакуіраваны наведвальнікі, сярод іх пацярпелых няма.
Як змагаліся з пажарам
У тушэнні сабора былі задзейнічаныя больш за 400 пажарных, удзельнічалі і супрацоўнікі, якія рабілі спробы выратаваць рэлігійныя рэліквіі, якія захоўваліся там.
Па дадзеных мясцовых СМІ, у ходзе ліквідацыі агню пацярпеў адзін пажарны. Ад выкарыстання пажарных верталётаў прыйшлося адмовіцца, паколькі канструкцыя сабора не дазваляла скідаць на яго вялікія аб'ёмы вады.
Пажарныя працавалі пазменна ўсю ноч напралёт, у выніку пасля 7-гадзіннай барацьбы з полымем агонь быў лакалізаваны, а затым ліквідаваны.
У ходзе пажару абрынуўся шпіль сабора, гадзіннік, частка даху, гарэла і апорная канструкцыя. Тым не менш, абвальвання фасада і дзвюх вежаў удалося пазбегнуць, удалося выратаваць і асноўную структуру Нотр-Дама.
Падтрымка ўладаў
Мясцовыя тэлеканалы на час перапынілі свае рэгулярныя перадачы для трансляцыі пажару.
Да сабору двойчы прыязджаў прэзідэнт Францыі Эмануэль Макрон, а таксама прэм'ер-міністр Эдуар Філіп.
Кіраўнік дзяржавы заявіў, што сабор Парыжскай Божай Маці "быў цэнтрам жыцця ўсіх французаў", "гісторыяй Францыі, якая згарэла". Кіраўнік дзяржавы назваў пажар "жудаснай драмай", аднак адзначыў, што горшага ўдалося пазбегнуць. Ён падзякаваў пажарным і паабяцаў, што сабор будзе адноўлены.
Пракуратура Парыжа пачала расследаванне па факце ўзгарання. Следчыя праводзяць допыт рабочых, якія рабілі рамонт. Па папярэдніх звестках, узгаранне можа быць звязана з рамонтнымі работамі, аднак афіцыйна версіі пакуль не называюцца.
Ацэнку шкоды плануецца распачаць у аўторак. Пачаты збор сродкаў на аднаўленне сабора.
Выратаванне рэліквій
Супрацоўнікі сабора разам з пажарнымі службамі прыкладалі ўсе намаганні для выратавання рэліквій, якія захоўваюцца ў храме. Як паведамілі ў мэрыі Парыжа, іх удалося выратаваць. У прыватнасці, ацалелі алтар і алтарны крыж. Таксама вядома, што цярновы вянок і туніка святога Людовіка таксама не пацярпелі, іх удалося нават вывезці за межы будынка. Акрамя таго, частку змешчаных у памяшканнях карцін атрымалася зняць.
Прадстаўнік сабора Андрэ Фіна заявіў, што ўсе святыя прадметы знаходзяцца ў рызніцы, ім нічога не пагражае.
Рэакцыя ў Парыжы і ў свеце
Вестка пра пажар маментальна распаўсюдзілася праз сацыяльныя сеткі. Людзі сталі прыязджаць да сабора з іншых раёнаў горада. Паліцыяй быў усталяваны перыметр бяспекі вакол будынка. Практычна ўвесь востраў Сітэ, на якім размешчаны Нотр-Дам, быў эвакуіраваны. Людзі, якія сабраліся, маліліся за выратаванне сабора.
Улады многіх краін, а таксама прадстаўнікі міжнародных арганізацый ужо выказалі словы падтрымкі з нагоды інцыдэнту. Шэраг урадаў ужо выказаў гатоўнасць аказаць падтрымку ў аднаўленні легендарнага сабора. Сродкі ўжо пералічваюцца і прыватнымі асобамі.
Сярод першых сваё спачуванне выказалі ў пасольстве Расіі і Беларусі. У Рускай праваслаўнай царкве пажар назвалі трагедыяй для ўсяго хрысціянскага свету.
