МІНСК, 22 кра - Sputnik. У Беларусі шмат садовых таварыстваў, якія не вывозяць смецце цэнтралізавана, што прыводзіць да ўтварэння стыхійных звалак у зялёных зонах. Праблема ў тым, што ў многіх з іх няма органаў кіравання, і дагавор на вываз адходаў заключыць проста няма каму. Ёсць і такія, дзе чальцы таварыства проста адмаўляюцца плаціць за гэта.
Карэспандэнт Sputnik высветліла, што зменіцца для садовых таварыстваў пасля ўступлення ў сілу змененага закона "Аб абыходжанні з адходамі" і што пра гэта думаюць дачнікі.
Рашэнне праблемы стыхійных звалак
На мінулым тыдні намеснік міністра прыродных рэсурсаў і аховы навакольнага асяроддзя Аляксандр Корбут распавёў журналістам, што змены ў законе "Аб абыходжанні з адходамі" закрануць садовыя таварыствы.
"Мінпрыроды турбуе, што на сённяшні дзень у многіх садовых таварыствах да гэтага часу не створаны органы кіравання і адсутнічаюць старшыні. У выніку ёсць таварыствы, якія не заключылі дагаворы на вываз смецця", - агучыў праблему прадстаўнік Мінпрыроды.
Паводле яго слоў, у новым заканадаўстве прапісана, што садовыя таварыствы будуць уключаны ў агульную схему абыходжання з камунальнымі адходамі. Простымі словамі, іх абавяжуць вывозіць адходы цэнтралізавана.
"Гэта дазволіць выключыць утварэнне стыхійных звалак у несанкцыянаваных месцах", - растлумачыў пазіцыю ведамства Корбут.
Зараз дачнікі аплачваюць колькасць рэйсаў, якія здзяйсняе аўтамабіль, на якім вывозяць смецце. Плануецца, што з уступленнем у сілу змененага закона яны будуць плаціць за рэальную вагу смецця. На думку Мінпрыроды, гэта дапаможа зрабіць таннейшай паслугу вывазу смецця для садовых таварыстваў.
Што думаюць дачнікі
Сябры садовых таварыстваў падзяліліся з карэспандэнтам Sputnik сваімі думкамі з нагоды будучых "смеццевых" новаўвядзенняў. Так, дачнік Кірыл распавёў, што ў іх садовым таварыстве пад Мінскам ужо больш за год няма старшыні, таму і ніякіх новых дагавораў яны ні з кім не заключалі. У тым ліку на вываз смецця.
"У гэтым годзе мы яшчэ не адкрылі дачны сезон, але ў мінулым з-за смецця ўзнікалі канфлікты з суседзямі. Мы з сям'ёй ездзім на дачу на мікрааўтобусе, таму самі вывозім ўсе адкіды і выкідваем іх ужо ў горадзе. А многія пажылыя дачнікі, хто ездзіць на аўтобусах, проста вывозілі на тачках смецце ў лес і рабілі выгляд, што так і трэба. Некаторыя спальвалі смецце прама на участках, таму стаяў дзікі смурод і дым - дыхаць было немагчыма", - паскардзіўся мужчына.
Ён разумее, што складана без машыны вывезці смецце, але арганізоўваць звалкі таксама не варыянт.
"Мы ж потым самі ў гэты лес ходзім і гэтым паветрам дыхаем. Можа, і добра, што абавяжуць вывозіць смецце", - рэзюмаваў Кірыл.
Галіна не проста дачніца - яна вядзе бухгалтарскі ўлік у садовым таварыстве ў Смалявіцкім раёне.
"У нас заключаны сезонны дагавор на вываз смецця з адной з кампаній. Мы вылучылі асобнае месца для сметніцы, купілі і паставілі там кантэйнеры. Вядома, аб асобным зборы смецця пакуль гаворка не ідзе, але хоць так. У іншых таварыствах і такога няма. Да нас адзін раз на тыдзень прыязджае машына і вывозіць смецце. Гэтага дастаткова, таму што большасць членаў СТ праводзіць там толькі выходныя. Мы зараз плацім за колькасць рэйсаў - чатыры ў месяц", - патлумачыла схему абыходжання з адходамі яна.
Па словах жанчыны, нейкіх праблем з гэтым няма. "Проста ўключылі кошт паслуг па вывазу смецця ў сяброўскія складкі пасля агульнага абмеркавання. Там сума зусім невялікая. Спачатку былі тыя, хто не хацеў дадаткова плаціць. У асноўным пенсіянеры. Але і яны здаліся", - распавяла дачніца.
Яна лічыць, што на іх садовым таварыстве ніяк не адаб'ецца новы закон.
"Мы ж і так смецце вывозім. Вядома, будзе прыемна, калі гэтая паслуга стане танней. Але і цяпер мы ўсім задаволеныя", - прызналася Галіна.
У садовым таварыстве, дзе адпачывае пенсіянерка Соф'я Міхайлаўна, усё па-іншаму.
"У нас у мінулым годзе ніхто смецце не вывозіў. Я прасіла суседа або сына - яны дапамагалі. Я ж на дачы жыву з мая па кастрычнік, таму трэба пастаянна кудысьці адходы падзець. У нас ёсць старшыня таварыства, але, калі быў сход , большасць была супраць плаціць дадаткова за вываз смецця ", - адзначыла яна.
Пажылая жанчына перакананая, што трэба вызначыць дакладны парадак вывазу смецця.
"Таму, што нехта добрасумленны, вывозіць сам у горад, а нехта па-свінску выкідвае па дарозе ў полі або ў лесе. Потым едзеш і цэлыя звалкі бачыш. Там і будаўнічае смецце, і бытавое, і ўсялякія старыя тэлевізары. Свінства, адным словам", - абурылася Соф'я Міхайлаўна.
На яе думку, будзе добра, калі прымусяць усіх дачнікаў смецце вывозіць.
"Толькі галоўнае, каб нядорага было. У мяне невялікая пенсія, таму не хацелася б, каб сяброўскія складкі моцна ўзраслі. Адмовіцца ад іх выплаты нельга. Паглядзім, як у гэтым годзе будзе", - сказала на заканчэнне пенсіянерка.
