МІНСК, 11 мая - Sputnik. Каля года зойме рэстаўрацыя старажытнага шлема з тысячагадовай гісторыяй, знойдзенага ў Бабруйску, паведаміў у пятніцу загадчык сектара рэстаўрацыі музея гісторыі Вялікай Айчыннай вайны Васіль Пчэльнікаў у эфіры тэлеканала АНТ.
Працы ўжо пачаліся: знаходка перададзена ў Мінск, у рукі супрацоўнікаў музея гісторыі Вялікай Айчыннай вайны. Пакуль шлем адмакае і чысціцца ад соляў у дыстыляванай вадзе, пасля пачнецца механічная чыстка.
"Пасля таго, як з вады дастанем, будзе рабіцца механічная расчыстка у асноўным. Хімічную рабіць непажадана, каб не правакаваць пачатак карозіі", - растлумачыў Пчэльнікаў.
Па завяршэнні рэстаўрацыі шлемам зоймуцца гісторыкі, якія павінны будуць высветліць, дзе ён быў створаны і па якой тэхналогіі. Па адной з версіі, знаходку X-XI стагоддзяў насіў полацкі князь Ізяслаў.
Што тычыцца далейшага лёсу экспаната, то яго збіраюцца вярнуць туды, дзе ён быў знойдзены, у Бабруйск, а менавіта ў мясцовы краязнаўчы музей.
Унікальны тысячагадовы шлем быў знойдзены на пачатку красавіка ў бабруйскім рачным порце. Да здзіўлення гісторыкаў артэфакт добра захаваўся. У дадзены момант у свеце ёсць толькі некалькі аналагічных знаходак.
