МІНСК, 10 чэр - Sputnik. Прэзідэнт Беларусі Аляксандр Лукашэнка прыняў рапарт аб адстаўцы міністра ўнутраных спраў Ігара Шуневіча.
Раніцай у панядзелак у прэзідэнта і Шуневіча адбылася рабочая сустрэча, падчас якой кіраўнік дзяржавы выказаў крытыку ў адрас міліцыі за "празмернасці" ў забеспячэнні бяспекі на Еўрапейскіх гульнях, а таксама за гульню ХК "Дынама-Мінск". Як стала вядома пазней, гэта была апошняя сустрэча Шуневіча з прэзідэнтам у статусе міністра ўнутраных спраў.
"Сёння я звярнуўся да кіраўніка дзяржавы з рапартам аб адстаўцы, і ён гэтую адстаўку прыняў", - паведаміў журналістам Шуневіч, яго словы прывяла БелТА.
Рашэнне аб сыходзе з пасады, па словах Шуневіча, з'яўляецца "вывераным, правільным і своечасовым".
"Вока замылілася"
"Пройдзены вельмі доўгі і складаны шлях працы ў міністэрстве. Шмат што зроблена. У нейкі момант я пачаў разумець, што трэба забяспечваць пераемнасць, дынаміку, хуткасць і эфектыўнасць прыняцця рашэнняў. І гэта досыць складана - быць актуальным. Па-першае, патрэбен свежы погляд на працу міністэрства. Па-другое, думаючы і пра сваю эфектыўнасць, лічу, што прыйшоў час змяніць род дзейнасці. Дастаткова доўга я знаходжуся на пасадзе міністра. Можа, вока замылілася. Можа, трэба паспрабаваць нешта іншае. Гэта адзіная матывацыя, я яе прывёў кіраўніку дзяржавы, ён з гэтым пагадзіўся", - растлумачыў Шуневіч.
Канкрэтныя прапановы па новым месцы працы Шуневічу пакуль не паступалі, аднак ён спадзяецца прынесці карысць краіне на іншай пасадзе. Як падкрэсліў сам экс-міністр, жыццё працягваецца, а жаданне і магчымасць працаваць ёсць.
"У сітуацыі, якая склалася, я не бачу абсалютна нічога экстраардынарнага. Усе развіваецца па спіралі. Сядзець склаўшы рукі я дакладна не буду. Спадзяюся быць карысным дзяржаве на любой пасадзе", - дадаў ён.
Шуневіч займаў мост кіраўніка МУС з мая 2012 года, раней ён быў першым намеснікам міністра - начальнікам крымінальнай міліцыі. Таксама працаваў у КДБ Беларусі - узначальваў там следчае ўпраўленьне, галоўнае ўпраўленне па контрразведвальным забеспячэнні праваахоўных і кантралюючых органаў, барацьбе з карупцыяй і арганізаванай злачыннасцю.
