МІНСК, 10 чэр - Sputnik. Беларускі прэзідэнт павіншаваў свайго калегу Касым-Жамарт Такаева з перамогай на выбарах прэзідэнта Казахстана.
Паводле папярэдніх дадзеных ЦВК Казахстана, Касым-Жамарт Такаеў атрымаў перамогу ў галоўнай палітычнай кампаніі, набраўшы 70,76% галасоў. Усяго ў пазачарговых выбарах, якія адбыліся 9 чэрвеня, удзельнічалі сем кандыдатаў. Гэта былі першыя ў суверэннай казахстанскай гісторыі выбары без удзелу былога кіраўніка дзяржавы Нурсултана Назарбаева.
У віншавальным лісце беларускі прэзідэнт адзначыў палітычную мудрасць і дасведчанасць Касым-Жамарта Такаева, якія паспрыяюць развіццю краіны і росту дабрабыту казахстанцаў.
Аляксандр Лукашэнка таксама выказаў упэўненасць, што развіццё беларуска-казахстанскага супрацоўніцтва поўнасцю адпавядае інтарэсам народаў дзвюх краін, таму што яно заснавана на стратэгічным партнёрстве.
"У гэтай сувязі з удзячнасцю прымаю запрашэнне наведаць Казахстан з афіцыйным візітам у бліжэйшы час", - гаворыцца ў віншаванні.
Прэзідэнт Беларусі пажадаў свайму калегу здароўя, дабрабыту і поспехаў на галоўнай пасадзе ў краіне, а ўсім казахстанцам - міру і працвітання.
