За мінулы тыдзень Дзяржаўная лясная ахова ліквідавала 19 лясных пажараў, агульная плошча ўзгарання склала 5,3 гектара. Найбольшая колькасць пажараў адзначалася ў лясным фондзе Гомельскай і Віцебскай абласцей, дзе было зафіксавана 7 і 6 выпадкаў узгарання адпаведна. У Брэсцкай вобласці былі ліквідаваныя 4 лясныя пажары, у Гродзенскай і Мінскай абласцях па адным, у Магілёўскай вобласці сітуацыя заставалася стабільнай, выпадкаў узгарання зафіксавана не было.
З-за ўмоў надвор'я, якія склаліся - спякоты і доўгай адсутнасці ападкаў - у большасці рэгіёнаў Беларусі на мінулым тыдні былі ўведзены абмежаванні і забароны на наведванне лясоў, нагадала прэс-сакратар Міністэрства лясной гаспадаркі Беларусі Анастасія Дакучаева.
"Гэтыя забароны прадугледжвалі поўную адмову ад наведвання лясоў грамадзянамі, у тым ліку для прагулак, адпачынку на прыродзе, а таксама забарону на ўезд транспарту за выключэннем службовага", - сказала Дакучаева.
Згодна з Лясным кодэксам РБ, рашэнне аб забароне наведвання лясоў і яго адмене могуць прымаць мясцовыя органы ўлады пры пагрозе лясных пажараў, дадала прадстаўнік Мінлясгаса. Ключавым фактарам пры прыняцці такіх рашэнняў з'яўляюцца ўмовы надвор'я - тэмпература паветра, вільготнасць, адсутнасць ападкаў.
"Цяпер мы назіраем дажджы ў шэрагу рэгіёнаў Беларусі. Забароны і абмежаванні дзейнічаюць у 46 раёнах нашай краіны, для параўнання - на пачатку мінулага тыдня пад забаронай знаходзіліся 82 рэгіёна", - распавяла Дакучаева.
Паступова пажаранебяспечная сітуацыя стабілізуецца, адпаведна, здымаюцца і абмежаванні на наведванне лясных масіваў, падагульніла прадстаўнік Мінлясгаса.
